2710/2022-2023

Joint Declaration.pdf

Aizawl, the 17th November 2022 : Vawiin khan Mizoram leh Assam Sawrkar hotute leh aiawh ten Mizoram leh Assam ramri buai chinfel chungchangah High Level Delegation inbiakna zing dar 11 ah Hotel Vivanta Guwahati ah an nei a. Mizoram atangin High Level Delegation hi Home Minister Pu Lalchamliana in a ho a, Rural Development Minister Pu Lalruatkima; Commissioner & Secretary Home Department Pu H. Lalengmawia; Joint Secretary, Home Department Pu Lalthiamsanga Sailo; OSD cum Joint Secretary Pu David H. Lalthangliana bakah I &PR aiawhte an tel a ni. Assam lam High Level Delegation hi Border Protection & Development Minister Shri Atul Bora leh Environment & Forests Minister Shri Chandra Mohan Patwary ten hoin Principal Secretary, Border Protection & Development, Shri Gyanendra Dev Tripathi, Principal Chief Conservator of Forests, Shri MK Yadav bakah heng Department pahnih hotulu dangte, Assam Police leh Home Department aiawhte an tel a ni. 

Assam leh Mizoram Sawrkar Minister leh official te chuan hemi chungchanga inbiakna neia thuchhuah intawm siam tawh te thlir letin, chungte ngaihtuah chunga hmalakna awm thei nia an ngaihte chu an sawi dun ve ve a. Hun rei tak sawihona an neih hnuin thuchhuah intawm Joint Declaration siam a ni a. Thuchhuah intawm ah Mizoram Sawrkar aiawhin Home Minister Pu Lalchamliana’n hming a ziak a, Assam Sawrkar aiawhin Border Protection & Development Minister Shri Atul Bora in hming a ziak ve thung a ni.  

Thuchhuah intawmah hian Mizoram Sawrkarin ramri nia kan pawm huamchhunga khua awmte, an area huamchin te, a geo spatial extent te, heng hmuna cheng mihring chanchin leh hnam awm (ethnicity) chanchin te leh chanchin dangte chu thla thum chhunga lak khawm ni se tih a ni a. Heng chanchin kimchang lakkhawm tur te chu a tul dan azirin ramri buai chingfel tur atana la din theih, State pahnih aiawhte telna Regional Committee te zirchian tura dah a ni a. Chanchin lakkhawm kawnga Assam Sawrkarin Mizoram Sawrkar chu a theihna apiangah an pui ang tiin an inhuam thu ziahlan a ni. August ni 5, 2021 ah Aizawla an inbiak tuma thuchhuah intawm siam chu State pahnih ten vawng nung zel se tih a ni. State pahnih ten ramri hrula cheng mipuite inkara boruak muanawm a awm zel theih nan thawh chhunzawm zel ni se tih ziah a ni bawk a. Mizoram High Level Delegation in Mizorama kuhva chingtuten an tharchhuah state pawna Assam kal tlanga an phurchhuahnaah harsatna lian tak an tawh mek chungchang an thlen pawh sawiho niin kuhva chingtute harsatna tawh mek chinfel a nih thei nan State 2 Chief Minister te hnenah hei hi thlen ni se tih a ni a. State 2 ten dan phal lova ramdang tharchhuah kuhva tawlhruk phurh chungchangah na taka hma lak chhunzawm zel ni se tih ziah a ni tel bawk. (Thuchhuah intawm hi pdf angin dah a ni) 

Thuchhuah intawm ziah a nih hnuin Shri Atul Bora te chuan chanchinbu mite hmaah Joint Declaration hi a chhiarchhuak a. Pu Lalchamliana chuan Mizoramin ramri kan pawm chu 1875 a inziah ang a ni a, he kan tan chan tihchian nan Joint Verification kan rawt a mahse Assam lam chuan hemi atan hian helai bawra chanchin kimchang lakkhawm ni se an ti a, kan tan chan tihchian nan thla thum chhungin details te hi kan la khawm ang a ti. Mizorama kuhva chingtute tunhnaia an tharchhuah Mizoram pawmna Assam kaltlanga phurchhuahna kawnga nasa takin harsatna an tawh mek thu sawiin India ram chhunga khua leh tui ten an tharchhuah hralhna kawnga hetiang taka harsatna an tawk hi a vanduaithlak a, chinfel a nih vat theih nan Mizoram leh Assam Sawrkar te a rualin hemi chungchang hi Sawrkar Laipui sawipui leh nawr a tul takzet a ni, a ti. Mizoram Sawrkar chuan ramdang tharchhuah kuhva Mizoram leh state dangte kaltlanga tawlhruk chu a veiin a la thu tak hle a, tunhnaiah pawh dan kalha kuhva tawlhruk man a nih theih nan Check Post 2 siam belh a ni, a ti.