2711/2022-2023

Aizawl 17th November 2022:  International Tourism Mart vawi-10 na hawnna nei tura lo zin Union Tourism Minister Pu G. K. Reddy  chuan vawiin khan Aijal Club-ah Press conference neiin tualchhung leh state pawn atanga lo kal media-te a kawm. Union Minister thusawi langsarte zingah rei lo teah hmarchhak state 8-ah DoNER office hawn tum a nih thu leh North East State capital 8 leh Delhi inkara nitin direct flight awmtir thuai nan hmalak mek a nih tur thute a tel.

Sorkar laipuia Ministry of Tourism chuan hmarchhak bial tana a buatsaih thin International Tourism Mart (ITM) vawi 10-na chu Mizoram-ah November ni 17-19, 2022 chhungin nghah niin ITM 2022 chuan Mizoramin khualzinte hip theihna kawng hrang hrang a neihte pholanna tura thil tangkai tak a nih beisei a ni a. Ni thum awh tur ITM ah hian North Eastern Tourism Minister-te, senior officer-te, State officer-te leh Tourism & Hospitality Association-a officer-te an tel dawn a ni.

India-in December ni 1 2022 atanga G20 hotulu ber (Presidency) a chelh tur behchhanin ITM hian ‘Priorities of G20 for Tourism Track’ chu a ngai pawimawh hle dawn a. He ITM hian North Eastern State 8-a sumdawngte leh tourism kaihhnawih sumdawng chi hrang hrangte hruaikhawmin, khualzinte, media te, sorkar leh mipuite tan intawhkhawmna leh indawrtawn nan buatsaih thin a ni.

ITM 2022 ah hian hmarchhak state 8 ten an state tourism potential presentation an nei dawn a, hnam ziarang inphochhuahna leh Aizawl leh a vel fan kualna neih a ni bawk ang. Hmarchhak state sumdawngte leh khaw hrang hrang atanga khualzin lo kalte B2B meeting a awm dawn bakah, state hrang hrangte handicraft leh handloom-te phochhuah a ni bawk dawn a ni.

International Tourism Mart hi hmarchhak state te zingah kum tinin neih chhawk thin a ni a, kumin hian Mizoram-in a vawi khat thlenna a ni. Guwahati, Tawang, Shillong, Gangtok, Agartala, Imphal leh Kohima ah te an lo nei tawh a ni.

Vawiin Press Conference-ah hian Union Minister hi Pu Robert Romawia Royte, Minister of State for Tourism, Government of Mizoram, Pu Arvind Singh, Secretary Ministry of Tourism, Government of India, Pi Manisha Saxena, Principal Secretary Tourism, Government of Mizoram, Pi Nanu Bhasin, Additional Director General, PIB, Government of India leh Pu Gyan Bhusan, Senior Economic Advisor, Ministry of Tourism ten an tawiawm a ni.