2537/2022-2023
Aizawl the 3rd November 2022 : Vawiin khan New Delhi-ah MP (LS) Pu C Lalrosanga chuan Consortium for Global Education, United States hotute chu Union Minister of State for Education and External Affairs Pu Rajkumar Ranjan Singh a hmuhpui a. Zirna lama India leh United States thawhhona zau zawk a awm theih dan tur kawngte an sawiho.

He sawihonaah hian America a University hrang hrang hotute an tel a, an Consortium for Global Education President Dr Carolyn Bishop-in a ho a ni. Minister of State for Education chuan National Education Policy hman tan mek a nih dan te sawiin, Digital University din tum mek a ni tih a hrilh bawk.

Hemi hma hian Pu Rajkumar Ranjan Singh chu kawmin Pu C. Lalrosanga chuan Mizoram leh Manipur-a Myanmar atanga bungraw tawlh luh mek a nih dan te Minister of State for External Affairs chu a hranin a sawipui hmasa tawh a. Dan kalha kuhva leh bungraw thenkhat tawlhluh ruk thin chu sorkarin a ngaimawh thu sawiin hemi chungchang hi a hrana ngaihtuah zui ni se a ti. Lok Sabha MP chuan Myanmar atanga raltlan lo lutte chhawmdawl chungchang leh KMMTTP kawng chungchangte a sawipui bakah Mizoram district hrang hranga Kendriya Vidyalaya leh Jawahar Navodaya Vidyalaya din tul a tih thu Minister chu a sawipui bawk a, hemi atan hian rawtna fel tak thehluh a ngaih thu Minister chuan a lo hrilh a ni.