3743/2024-2025 

Dated 10^th January, 2025: Ni 7.1.2025 (Thawhlehni) khan Mizoram Public Service Commission (MPSC) in tunhnaia Entomologist under H&FW Department hnalakna a kalpui dan chungchangah MPSC a thawktute leh Mizo Zirlai Pawl (MZP) General Hqrs. hruaituten inkawmkhawmna hun, MPSC Office-ah an nei a. He hunah hian MPSC lam aiawh mi 6 te hi Secretary Dr.H.Lianzela'n a ho a, MZP lam aiawhin an President, Pu H.Lalthianghlima hovin OB mi 4 leh Adviser te an tel a ni. 

December ni 12, 2024 a MZP thuchhuah a tarlan: "MPSC-in Entomologist hna a lak dan leh Veterinary Asst. Surgeon hna a lak dan hi chhui chiang a, a tul anga hma la turin Mizoram Sawrkar a ngen a. December ni 20, 2024 ral hmaa hmalakna a awm lo a nih chuan, hmalak zel dan tur a ngaihtuah dawn a ni," tih chungchang ngaihtuah ho tura inkawmkhawmna leh Kumthar thingpui inhona hi neih a ni. 

Boruak tha tak hnuaiah inkawmhona hi neih a ni a, MZP lamin an thil hriat duh leh hriat chian loh an neih hrang hrangte leh dikhlel nia an ngaih laite thil awmzia diktak hmaichhanah inhrilhfiahna hun hman a ni. MPSC leh MZP hian hun lo kal zel turah thawhhona tha tak nen inpawh taka hmalak ho zel tha an ti tlang a, MPSC zahawmna humhim a nih zel theih nan leh tha taka a kal theih nan thawhdun zel nise an ti bawk. 

MPSC sawmna ngai pawimawha inkawmkhawmnaa MZP an lo tel theih avangin MPSC chuan lawmawm a ti hie a. MPSC hnathawhna kawngah hriat chian duh an neihte zawt fiah a, a tul ang zela thurawn pe a, finchhuah thin turin Commission chuan MZP te hi a ngenin a sawm a ni.