427/2025-2026
Dated Aizawl: the 01 May 2025 : Vawiin khan Mizoram Public service Commission a thawk tute chuan an kum 34 tlin lawmna hun chu Mc Cabe Hall, Aijal Club ah Pu R. Lalramnghaka, Chairman, MPSC hovin an hmang.
He hun hi Dr. H. Lianzela, Secretary, MPSC chuan a kaihruai a. Thawktute intuaitharna leh infuihtharna atan hman a ni in, Chairman leh Member, MPSC ten fuihna thu an sawi bakah MPSC a din tirh aṭanga tun thlenga la thawk mekte chawmawina hun hman nghal a ni.
Pu K. Rosiamliana, Joint Secretary in MPSC lo indinchhoh dan sawiin, Pu James Lalrinchhana, Controller of Examinations chuan lawmthu sawiin hun a khar a ni. Kum 34 tlin lawmna inkhawmah hian MPSC Documentary Film thlir ho a ni a, MPSC Calendar leh Digital Filing System te pawh tlangzarh a ni.
Mizoram Public service Commission hi India Danpui Article 315-na tlawhchhanin kum 1991 khan din a ni a. Kum 1991, May ni 1 khan Mizote zinga IAS ni thei hmasa 3-na, Pu SR Vala chuan Sawrkar in a ruat angin MPSC Chairman hmasa ber ni turin a hna a zawm a. Hei hi vawiin thlengin MPSC din ni atan pawm chhoh a niin, kum 2025 hian kum 34 a lo tling ta a ni.
Kum 1991 atanga vawiin thlengin MPSC hian Chairman 12 nei tawhin, Member ni tawh pawh mi 21 zet an awm a. Anni puibawmtu (Officer & Staff) zinga hotupa ber, Secretary pawh mi hrang hrang 11 lai he hun chhung hian awm tawhin, Tun dinhmunah hian MPSC chuan sanctioned post 86 a nei mek a ni.
Group A leh B Direct Recruitment hmanga kum 34 chhunga a lak zawng zawng belh khawm chu mi 3792 an ni tawh a. Sawrkar hnathawk lai mi tam tak in kaisanna an hmuh theih nan Departmental Promotion Committee (DPC) meeting vawi 4578 zet neih a ni. Departmental Exam, Limited Competitive Exam leh Induction atana Exam eng emaw zat a buatsaih tawh a. Mi ṭhahnem takin promotion an lo hmu tawh a ni.
MPSC hian a hnathawhna kawngah faina lama lawmman te bakah lawmman dang hlu tak takte pawh a lo la tawh thin a ni-
1. RTI Excellence Award for 2024-2025 – 1st Prize
2. Government Online Excellence Award 2021-2022- Official Department Website Category: First Prize
3. Government Online Excellence Award 2021-2022- Best Online Service Initiatives: First Prize
4. Government Website Award 2022-2023 : First Prize
Hna zawng lai leh ṭhalai te tan Online portal mpsconline.mizoram.gov.in, siam niin, hna zawng mekte tan a ṭangkai hle a. Awlsam taka application submission, payment tih fel leh admit card download theih a ni a, candidate te tan a awlsam hle. MPSC Website https//: mpc.mizoram.gov.in pawh rintlak tak leh active taka vawn niin mipui ten information an mamawh te chu engtik lai pawhin en theih tura enkawl leh update a ni.
