426/2025-2026

Aizawl, the 1st May 2025: Chief Minister Pu Lalduhoma chuan vawiin khan Secretariat Conference Hall-ah Environment, Forest & Climate Change Department te hnathawh dan thlirpuina Review Meeting a nei.

Chief Minister thusawi tlangpuite:

1. Sawrkarah aikal la an awm tawh loh kan beisei a. An la awm chuan action lak nghal tur. Hun kan inpe rei tawk tawh.

2. Officers thenkhat sawrkar facilities mahni kawl theih chin (entitled) bak lo kawl kan la awm chuan, kan sawi tawh thin angin lo kir vek se a finthlak ang.

3. Biometric attendance tha taka kalpui kan duh a. Sawrkar hnathawkte hian hun kan vawng dikin kan hlawh phuin hna kan thawk tur a ni. Service Review Committee te pawhin hna an thawh tawh hlawm kan beisei a, chhawr tlak ngang loh hnathawktu chu special pension kha pek mai tur a ni.

4. Hmasawnna hnathawh dawnah forest clearance hi lak zel a ngaih avangin, hmasawnna hnathawh chak taka kan kalpui theih nan lo tanpui thin turin ka ngen che u a. Kan ram hian hmasawnna hmel thar hi hmu thuai thuai se kan duh a ni.

5. e-office hi kalpui tumin kan inpuahchah mek a. Sawrkar hnathawkte kan intuaihriam ve reng a tul tih hria ang u. Tin, contract inpekna kawngah miin a duhsak zawng ringawt a pek thin loh nan Integrity pact kan siam a, zawm vek kan tum dawn nia.

6. Project reng reng hi Planning Department hriatpui lo va kalpui kan rem ti lo va. Planning Department ah thlen zel tur a ni. Department ten inhre tawn lovin project inang tak tak te, inhnaih tak tak te kan kalpui hian ramin a hlawkpui tur angin a hlawkpui loh phah thei, tih te a ni.

Thuhma a sawi zawh hian EF&CC officer ten an hmalakna leh hnathawh te presentation kimchang an pe a. An report atangin Chief Minister-in hriat belh duh a neih te, zawhna a neih te zawtin, hmalak zui zel dan turte an sawi nghal zel a ni.

December 2023 atanga vawiin thlengin Forest Clearance 12 pek fel a ni a, project 5 te a thuphunga pawm (inprincipal approval) an ni tawh. Project 3 chu approve tawh sa, penal NPV pek loh an awm thung. Project pahnih clearance chu Ministry of EF & CC lam nghah mek a ni a, an dilna lehkha a fel fai tawk loh vanga nghah mek (pending) project pathum an awm a, Mizoram State CAMPA Fund hi Rs. 199 crore a awm mek.

Vawiin review meeting hi Pu Lalthansanga, Minister, EF & CC chuan a kaihruai a, Pu TBC Lalvenchhunga, Adviser to CM, Pu H. Lalengmawia, IAS, Commissioner & Secretary, Pu K. Lalthawmmawia, IAS, Commissioner & Secretary, Pu Vanlaldina Fanai, Commissioner & Secretary, Pu Rajeev Kumar Tiwari, PCCF leh EF&CC officers te, Finance leh Planning Department Officials te an tel a ni.