824/2022-2023
Champhai, the 8th June, 2022: Mizoram Public Service Commission (MPSC) Member Pu Vanlalngaihsaka, IAS (Rtd.) chuan vawiin chawhnu dar 2:00 khan MPSC Examination Centre, Govt. GM Higher Secondary School, Champhai Vengsang chu tlawhin Exam buaipuitute a kawm.

Pu Vanlalngaihsaka chuan Champhaia MPSC Examination Centre hlawhtling taka kalpui a ni chu lawmawm tiin, tul leh mamawhte sawia inrawntlanna hun Centre Supervisor, Centre Superintendent, Invigilator leh District hotute nena neih a ni chu hlawkthlak a tih thu a sawi a. Examination lo buatsaih tawhna atanga thu thlen duh leh tul angte zirchian bakah hmasawnna awm theite ngaihtuah tlang tuma inrawnkhawmna neih a nih thu sawiin, mamawh leh tulte inthlahrung hauh lova thlen turin kalkhawmte a sawm a. Zirlaite High School an kal lai atangin nakin huna an nih tum leh hlawhtlinna an neih theih nana kawng kawhhmuh a tul thu sawiin, hemi kawngah hian Zirtirtute chu theihtawp chhuah turin a chah a ni.

District Bawrhsap Pu James Lalrinchhana pawhin thu sawiin, MPSC Office chhawphnaia MPSC Member-in Champhai tlawha Examination Centre a rawn endik chu lawmawm tiin, exam him leh entawntlak buatsaih zel a nih theih nana rawtna neihte thlen nana hun tha tak buatsaih chu chhawr tangkai a nih ngei a beisei thu a sawi a. Zirna in ah te infuihtharna leh nakin zela Zirlaite kalzelna tur kawng inkawhhmuhna lam hawi buatsaih tuma ngaihtuahna sen a nih thu a sawi bawk.

He hunah hian Champhai SP Pu Lalrinpuia Varte hnen atangin Exam venhim kawnga hmalakna turte ngaihthlak a ni a. Kalkhawmte atangin thu thlen duh leh ngaimawh zawngte ngaihthlak a ni a. Govt. GM Higher Secondary School Zirtirtu leh MPSC Exam Invigilator kalkhawmte chuan examination buatsaih a nih hmaa MPSC atanga inzirtirna buatsaih a ni thin chu hlawkthlak an tih thu an tarlang a. School Principal Pi C.Laltani, Centre Superintendent hnen atangin exam huaihawt avanga harsatna an tawh loh thu leh, exam beitu thahnem tak dawlzo thei tur hmunhma an neih thu ngaihthlak a ni bawk.

Kum 2009 atang khan Govt. GM Higher Secondary School hi MPSC Examination Centre atan hman tan a ni a, mi 500 chuang exam theihna hmunhma an nei a ni.

He hunah hian Centre Supervisor Pu Lalnunfela Chawngthu, SDO Sadar, DIPRO Dr. Lallawmkima leh Govt. GM Higher Secondary School thawktute an tel a ni.