825/2022-2023

Kolasib dated 8th May 2022: Vawiin khan Governor Dr. Hari Babu Kambhampati chuan Kolasib district tlawhin DC Circuit House tualzawl ah Kolasib district-a thuneitute leh khawtlang hruaituten an lo hmuak a. Conference Hall, DC Circuit House-ah Kolasib district chhung a Department hrang hrang hotute nen inkawmna hun hmangin Kolasib district tih hmasawnna tur a Sawrkar laipui Scheme kalpui dan te sawi ho a ni.


Mizoram Governor Dr. Hari Babu Kambhampati chuan Kolasib district chhung a rel kawng siam mek leh 4 lane kawng siam tur a ruahmannate chuan inkalpawhna kawngah hmasawnna nasa tak a thlen tur thu leh zofate tan leh state pawn mite tan pawh inlaichinna țha a thlen phah ngei a beisei thu a sawi a. Mizoram tan hmasawnna hmel thar a thlen ngei a rin thu a sawi. Sawrkar Department hrang hrang chuan mipui nawlpui thleng pha hmasawnna hna ngai pawimawh turin a chah a, Sawrkai laipui ruahmanna a scheme hrang hrangte chu mipui tan a duan a nih angin mipui hnen a hrilhhriat leh a hmathatnate pawh mipuiin an tel ngei theihna tur a mawhphurna chu Sawrkar hnathawkte leh Bank-a thawktute kutah thui tak a innghah thu a sawi. Mizoram chhung a kawlphetha siam chhuahna pawimawh tak pahnih Kolasib district chhung a awm te tarlangin intodelh theihna leh hralh chhuah tur thleng a siam chhuah theihna Mizoram chuan a neih thu a sawi a, chumi tur chuan ngaihtuahna sen a țul thu a sawi.

He hun ah hian Pu John LT Sanga, Deputy Commissioner, Kolasib chuan kalkhawmte lawmna thu sawiin Kolasib district chanchin tlangpui tarlanna hun a hmang a. Serlui leh Tuirial tuikhuah hmang a kawlphetha siam chhuahna hmun Serlui B Hydel Project, 12 Megawatt leh Tuirial Hydel Project 60 Megawatt pechhuak thei a awm thu te, inkalpawhna changtlung zawk a awm theih nana NHIDCL-ten 4-lane kalpui tur a an ruahmannate leh Rel kawng siam pawh chak tak a kalpui mek a nih thu a tarlang a ni. Pu Vanlalfaka Ralte, SP, Kolasib pawhin dan leh thupek kenkawh kawng a hnathawhna kalpui dan leh ramri venhim kawng a Police-te hmalak dan he hun ah hian a hmang bawk a ni.

Mizoram Governor Dr. Hari Babu Kambhampati chuan Circuit House, Kolasiba hun a hman zawh hian  Counter-Insurgency and Jungle Warfare School, Vairengteah zanriah a ei ang. Naktuk June ni 9, 2022 hian Vairengte ramria Police duty-na hmun thlawhin hun a hmang leh ang a, Vairengte khaw chhung a Sawrkar laipui scheme kalpuite a hmun ah a tlawh dawn bawk a ni.

Attachment

  • Loading attachment...