2698/2024-2025

24^th October, 2024: Mizoram Public Service Commission (MPSC) hnathawh dan kalhmang, a hnatawh mek leh a hmachhawp thenkhat te puanzar tûl a ti a. A hnuaia mi ang hian MPSC chuan mipuite hriat turin ngenna leh hriattirna thuchhuah a siam a ni.

1. MPSC hi India Danpui, Article 315 hnuaia din a ni a, din a nih chhan ang ngeiin mipui leh Sawrkar tan chhen fakawm takin a tir atanga vawiin thlengin Commission hian hna a la thawk chhunzawm zel a ni.

2. Kum 2024 Calendar year kal mekah hian Sawrkar hnathawk lai te an kaisan theihna turin Departmental Promotion Committee (DPC) vawi 209 a thu tawh a, mi 505 zet te chu an hnathawhnaah an kaisan theih phah a ni.

3. Direct Recruitment hmanga hnaruak hnawhkhahna turin kum 2024 chhung hian Group A leh Group B (Gazetted) bikah Post hrang hrang 22 atan vawi 17 examination neih a ni tawh a, Group B (Non-Gazetted) hnalakna atan turn 3 examination buatsaih a ni tawh. Hei bakah hian Department hrang hrang 5 hnuaia thawktute tan Departmental Examination vawi 1 huaihawt sak tawh a ni a, Sawrkar hna thawk lai mekte kaisanna turin department hrang hrang 8-a thawktu te tan Limited Departmental Examination neih a ni a, Sawrkar hna diltute’n Mizo tawng an thiam ngei em tih fïnfïahna turin Mizo Language Proficiency Test/Exam vawi 1 neih a ni tawh bawk.

4. Mizoram Sawrkar thuchhuak angin Group A leh Group B chin, Pay Matrix Level 6 leh a chunglam hnalakna atan MPSC in Examination a kalpui mek a ni. Home Department leh Excise & Narcotics Department hnuaia Asst. Sub-Inspector (ASI) leh a chunglam te, EF&CC Department hnuaia Dy. Ranger (Level 6) chin chunglam te, Commerce & Industries hnuaiah Marketing Inspector (Level 6) chin chunglam zawng te hi MPSC in a buaipui tur chi a ni a. Heta Department tarlan hnuaia thawktu dang, heng - Asst. Marketing Inspector-Level 4(Commerce & Industries) te, Forester- Level 4 (EF&CC) leh Head Constable-Level 4 (Home Department) te chungchang erawh chu MPSC huang pawn lam a mi a ni.

5. Home Department hnuaia Assistant Sub-Inspector (M) hnalakna kalpui mekah ‘measurement’ tih hun pawhsei a ni leh, 1000m & 100m tian hun chhung bituk siam tawh tihdanglam a nih chungchangah he thil hrethiam lo mi thenkhat an awm niin a lang a. MPSC portal/website-a lut thei lo mi thenkhat an awm tih hriat a ni a, hei mai bakah Mizoram chhung hmun tam takah leimin/kawngchhia avanga mahni measurement tih huna an khua atanga Aizawl thleng thei lo Candidate mi eng emaw zat an awm tih hriat a ni bawk. Heng mi te avang hian loh theih lohvin measurement lak hun pawhsei a ngai ta a ni. Tin, 1000m & 100m tian hun chhung bituk tihsei/tihrei chungchangah hian ASI(M) Recruitment Rules-a lang lo, Mizoram Police Manual-a chuang bawk si a awm avangin Police Manual behchhanin tian hun chhung bituk hi Home Department duhdan angin tihdanglam a ngaih phah ta a ni. Hemi avang hian MPSC chuan Corrigendum tichhuakin, a hma lama hriattirna a lo siam tawh chu a  tidanglam leh a ni.

6. Examination buatsaih a nih reng rengin a tha leh felfai thei ang bera buatsaih thin a ni. Zawhna siam chungchangah te, Syllabus duan chungchangah te Candidate tana tha ber tur ni a hriat angin hma a la mek zel a. Hemi kawngah pawh hian hmasawnna hmuh theihin a awm chho mek zel bawk.

7. MPSC hi Constitutional leh Independent body a ni a, Sawrkar leh mipui tana hna a thawhna kawngah sawiselna leh rawtna nei an awm chuan Chairman emaw, Secretary emaw hnenah a duh tan a thlen theih reng a. Chanchinbu leh Social media-a kan zualko hmain thil awmzia hriatchian hmasak turn phawt tur te, sawiselna leh rawtna neite chuan Office lamah ziaka thehlut zawk thin turin Commission chuan mipuite a ngen a ni.

8. Tun hnaiah MPSC-a rinna nghat mi tarn tak an awm te, MPSC a kalsual palh hlauhna avanga social media leh chanchinbu lama thahnem ngai taka auchhuak thin an awm hi a lawmawm em em a, heng mi te thu leh hla hi Commission chuan a ngaihlu hie a ni. Chutih laiin, social media leh chanchinbu hmanga auchhuak lem lo, ‘MIPUI AW’ (CPGRAMS) leh ‘RTI Act’ hmang tangkaia MPSC tana thil tangkai tur zawhna, rawtna leh sawiselna rawn thlen thin mi eng emaw zat an awm bawk a, anni phei hi chu MPSC tan hian an hlu lehzual em em a ni. Heng mi tangkai tak tak te hian tha thlah mai lova MPSC hi min vênpui a, thurawn tha tak tak rawn pe chhunzawm zel turin Commission chuan a sawm a ni.

9. Right to Information (RTI) Week, 2024 chu October ni 11, 2024 (Zirtawpni) khan ATI Auditorium, MINECO-ah hman a ni a, RTI Excellence Award, 2024-2025 sem a ni. He hunah hian Mizoram Public Service Commission chuan lawmman 1-na (1^st prize) a dawng. MPSC hi Mizoram chhunga RTI Act hmanga zawhna dawng tarn ber a ni hial maithei a, chuti chunga lawmman 1-na a la thei hian chiang taka a entir chu - Commission hi langtlang taka hnathawk thin, khua leh tui (a bikin hna zawng mek) te chanvo tha taka humhim sak tu leh Democracy chawinung tu pawimawh tak a ni tel bawk awm e. Mipuite pawh RTI Act hi hmang tangkai chhunzawm zel turin Commission chuan a sawm a, chumai bakah MPSC hnathawh danah rawtna emaw, sawiselna emaw nei an awm chuan lawm taka dawng turin Commission chu a inpeih reng a ni.