Mizoram Rural Bank (MRB) Branch 71-na, MRB Bawngkawn Branch chu vawiin khan Revenue Minister Pu J. H. Rothuama’n a hawng a, hemi hnu hian bank hawnna puala inkhawm tawite chu Bank building-ah, neih nghal a ni.

Pu J. H. Rothuama chuan Mizoram Rural Bank chu Mizoram leh Mizoram mipuite tan din anih avangin a ram mipute ta bik a ni a, a hlawkna te pawh Mizorama cheng mipuiin kan sengin kan chhawra, chuvangin kan chawivulin kan hman tangkai thiam a tul a ni, a ti. Mizoram Rural Bank-in Mizoram khaw hrang hranga an inzarpharh avangin mipuiten ten Bank an hmelhriat tan thu leh an chhawr tangkai thu sawiin, tun aia Branch tam zawk din nise tiin a duh thu a sawi bawk.

Bank hawnna inkhawm hi Senior Manager (MIS) in a kaihruai a, hunserh chu Rev. G. Chhunthuama’n a hmang a. He hunah hian MRB Chairman Pu Bhupen Deka pawhin thusawiin bank dangten an neih ang – Core Banking Solution te, internet banking te, NEFT te pawh MRB in a nei ve tawh a, Debit Card leh ATM facility pe thei tura hmalak mek a ni, a ti bawk. NABARD, General Manager Pu P K Das leh Bawngkawn Local Council President Pu Lalawmpuia ten thu an sawi ve bawk a ni.

Mizoram Rural Bank hian Aizawl khawpui chhungah Branch 13 an nei mek a ni.