3610/2024-2025

Aizawl, the 19th December, 2024: Vawiin chawhma khan Mizoram Rural Bank (MRB) Chairman Pi Sheryl Vanchhong chuan Mizoram Governor Dr. Hari Babu Kambhampati chu Raj Bhavan-ah hmuin MRB hmalakna, hmachawp leh mamawhte an sawidun.

Governor Dr. Hari Babu Kambhampati chuan MRB hotute chu mipuite'n bank kaltlanga hamthatna an dawn theihte bakah, bank hman tangkai dante an hriat chian lehzual nana tan la chhunzawm zel turin a chah a. Social Security Scheme leh loan pek chhuak lamah theihtawp chhuah chhunzawma, puih ngaite pui hreh lo turin a chah a ni. 

Pi Sheryl Vanchhong chuan Mizoram khawpui leh thingtlang thlenga MRB a inzarpharh that thu sawiin, Social Security Scheme leh bank hman tangkai dan inzirtirna pawh tha taka an kalpui thu a sawi a. MRB chauh nilo, bank hrang hrang customer te'n MRB hnuaia CSP te an dawr theih nana Aadhar authentication leh Inter Operable Micro ATM kaltlanga bank account hawn chunchanga harsatna awmte pawh tarlangin, he harsatna hi chinfel a nih theih nan thuneitu NPCI  lama hmalak sak turin Governor hi a ngen a ni.  

MRB Chairman leh amah rawn tawiawmtu Pu Lallawmzuala Colney, General Manager, MRB te chuan banking sector tihhmasawn kawnga Governor thahnemngaihnaah lawmthu an hrilh a ni.

MRB hian tun dinhmunah Mizoramah branch 105 nei mekin hei hi Mizoram Bank awm za zela 40 a ni a, thingtlang bikah chuan za zela 73 an ni pha a ni.