Vawiin chawhnu khan Mizoram State AIDS Control Society a thawktute leh Mizoram Kohhran Hruaitu Committee a hruaitute chuan Health & Family Welfare Department Minister pisa, MINECO ah thutkhawna hun an hmang a, Health minister Dr R Lalthangliana’n he hun hi a kaihruai.

Minister Dr R Lalthangliana chuan Mizoram a HIV positive awmzat chu India ram a HIV kai zat hrut rual let 10 vel anih thu sawiin Department pakhat chauh hmalakna a he natna khirh tak darh zel hi ven theih anih loh thu a sawi a, Sawrkar department hrang hrang thawh hona bakah tlawmngai pawl hrang hrangten theihtawp chhuah a tan kan lak tlan a tul thu a sawi. Minister chuan AIDS hlauhawm zia inhrilhhriat hna te leh a darh zel venna kawnga hmalaknate chu sawrkarin theihtawp chhuahin tan la thin mahse tlawmngai pawl hrang hrang nena thawh hona nen he natna darh zel tur hi ven a ngaih thu a sawi a, MKHC chu mi puitling leh kohhran hrang hranga hruaitu rintlak a ngaih te awm khawmna anih angin sawrkar nena he natna darh zel dona kawngah AIDS a kan dinhmun chiang zawk a an hriat leh an hmalakpuina a pawimawh thu a sawi bawk. 

He hunah hian MKHC hruaitute leh MSACS a thawktuten inkawmna hun hmangin Mizoram a HIV dinhmun te chiang zawk a inhrilhhriat a ni a, Dr F Lallianhlira, Principal Director chuan AIDS avanga chhungkaw tam takin buaina nasa tak an hmachhawn thu a sawi a Pu H Lalengmawia, Secretary, H&FW department chuan entawntlak a tupawhin nun hman a tulzia sawiin nu leh pa ten fate tana entawntlaka nun an hman hi he natna tihbaiawm tak do nana thil pawimawh ber a nih thu a sawi bawk. Dr Lalthlengliani, Project Director, MSACS chuan Mizoram a HIV darh dan  kawng hrang hrang te, a hmuh chhuah dan te, natna vei enkawl dan te leh Mizoram a AIDS dinhmun tarlanna hun a hmang bawk.

Mizoram ah hian Sawrkar pisa khar ni chhiar tel loh in nitin mi 9 HIV hrik pai hmuhchhuah belh ziah anga chhut a ni a, kum 2019 January thla leh September inkar hian Aizawl ah 843, Champhaiah 84, Kolasibah 94, Lawngtlaiah 11, Lungleiah 120, Mamitah 55, Siahaah 14 leh Serchhipah 36 hmu belh a ni. HIV hrik pai hmuhchhuah tawh zingah kum 14 hnuailamah 3.17%, kum 15-24 ah 23.03%, kum 25-34 ah 42.38%, kum 35-49 ah 26.46% leh kum 50 chung lamah 4.96% anga chhinchhiah a ni a, kum 2018-19 khan Nu naupai zingah HIV hrik pai mi 208 hmuhchhuah a nih laiin kum 2019-20 (September) thla thleng khan HIV pai mi 88 hmuhchhuah a ni a, Nu naupai zingah HIV hrik pai hi kum hmasa aia tlem zawk anga chhinchhiah a ni.