Tukin zing khan Aizawl Municipal Corporation (AMC) chuan Aizawl khawpuia plastic hman tlem/khap programme an kalpui mek bawhzuina chikhat, mipui zirtirna nihpahfawmin sikul naupangte tan 'Plastic Free City' Rally an buatsaih a. Chanmari leh Sikulpuikawn atangin High School leh Higher Secondary zirlai naupang  sang chuang te chuan plastic hman that lohzia thuziak te kengin kawng an zawh a, heng hmun hnih atanga zirlai kalkhawmte chu Lammual ah intawkhawmin programme an hmang a. Lammual a programme hi Chief Secretary Pu Lalnunmawia Chuaungo in a hmanpui a ni.

Chief Secretary Pu Lalnunmawia Chuaungo chuan AMC hmalaknaa plastic, a bik takin vawikhat hman a paih mai chi 'single use plastic' lakah beihpui an thlakna te, micron 50 aia pan plastic khapna an kalpui mek leh plastic hlauhawm zia zirtirna an pek mek te chu fakawm tiin he hmalakna phur taka tihlawhtlingtu AMC Mayor leh Councillor te inpekna chu a chhuanawm a tih thu a sawi a. Sikul naupangte chu plastic hmang loh tura ngenin plastic in hriselna a khawih chhiat dante, kan chhehvel a ti bawlhhlawh dante leh boruak leh tui ah te nghawng tha lo a neih dante chu midang zirtir tura chahin an nitin nunah plastic tel lova khawsak tumin, a hmahruaitu ni turin a fuih a. Naupangte atanga plastic hman loh inzirtir chuan hun kal zelah thangthartea awmzia thui tak a neih a beisei tiin Chief Minister Pu Zoramthanga pawhin Plastic Free Aizawl chu a thil ngaihpawimawh zinga ami a nih thu a sawi lang a ni.

Lammual a Rally kharna a thusawitu dang AMC Mayor Pu PC Lalhmingthanga chuan Aizawl khawpui a chengte chu faina leh thianghlima kawnga te leh bawlhlawh paih dana te kan thangharh mek a, Local Council te nen tangrualin bawlhlawh paih dan ruahmanna kalpui mek ah mipui tawiawmna kan hmu tha hi thil lawmawm tak a ni, a ti a. Aizawl chu Smart City a puan anih tawh thu sawiin chumi bawhzuina atana plastic a tlem thei ang ber hman leh vawikhat hmana paih mai ang chi single use plastic, bawlhhlawh siam mai mai te khap chu AMC chuan hnapui a neiin Plastic Free Aizawl siam turin hma an lak dante a tarlang a. Platic tel lova khawsak thiam inzir chu thil pawimawh leh tul ani tiin he thilah mahni zawna theuh hma la in AMC ruahmanna kalpui mek chu tihhlawhtling turin mipuite a sawm a ni.  

Lammual a Rally programme kaihruaitu Municipal Commissioner Pu K. Laldingliana chuan AMC hma lakna tobul te a sawi a. Pi Zonunsangi, Councillor kaihhruaina hnuaiah Plastic bawlhhlawh siam lo tura thutiam a rualin kawlkhawmte chuan an sawi a. Pu Lalhmingmawia, Councillor leh Chairman, Committee on Plastic Free City, AMC chuan lawmthu sawiin hun a khar a ni.

Zing dar 7 khan Chanmari ah leh Sikupuikawn ah te function tawi te neih a ni a. Chanmari ah  Pu Rosiamngheta, Councillor leh Sikukpuikawn ah Pu H. Zonunsanga leh Pu H. Vanlalruata, Councillor-te kaihhruainain programme tawi te hman zawh a, sikul 14 atanga zirlai 1500 bawr te chuan Rally kharna hmang turin Lammual an pan a ni.

AMC hian 2017 chho atangin plastic khap buapui turin Committee on Plastic Free City a din a. Mizoram pawna khawpui thenkhata te Study Team intirin plastic an khuahkhirh leh khap dan te an zir a. Chumi hnua hemi khaihhnawih dan 'Plastic Waste Management & Handling Rules' te siamin micron 50 aia pan plastic hman khapna dan te chu kumin laihlawh atangin hman tan a lo ni ta a ni.