Vawiin khan GSA Playground, Mamit-ah District Child Protection Unit, Mamit District buatsaihin  Children’s Week hawnna atan ‘Happy Childhood’ tih thupui a hmangin Fun Day programme hman a ni.

Pu Shashank Jaiswal IPS, Superintendent of Police Mamit chuan he hun hawngna hi neiin District Child Protection Unit, Mamit-te chungah lawmthu a sawi a, Mamit naupangte’n hlim taka hun an hman theihna tur a ruahmanna an siam hi tha a ti in finthlak a tih thu a sawi. Kan ram a naupangte himna leh hlimna chu mitin kutah a awm a ni tiin, chutih rual chuan puitlingte leh khawtlang mipuite kan thawhhona a pawimawhin kan tanrual thiam a tulzia a sawi bawk. Mamit District chhung a naupang te'n harsatna an nei a nih chuan Mamit Police-te chu engtik lai pawhin an mahni tanpui turin an awm reng a ni a ti. Naupangte chu hun nuam leh hlimawm tak hriatreng tlak hmang tura chahin, naupang venhimna kawng a hmasawnna pe zualtu atana hmang theuh turin kalkhawmte a sawm a ni.

He hun hi Pi Vanlalruati, PO(IC) DCPU chuan kaihruaiin Dr. R. Lalrinhlua, DCPO pawhin Mamit khaw chhung a naupangte tan a Fun Day siam a nih chhan leh naupangte tan a hun zalen leh thawl zawk pek thin a pawimawh thu a sawi a. Naupangte chu nakin huna kan ram hruaitu turte an la nih avangin uluk taka enkawl chu kan mawhphurhna a nih thu a sawi.

He Fun Day-ah hian DCPU chuan naupang in tih hlimna chi hrang hrang Bouncy, Trampoline, See Saw, Mega Block, Ball Pool-te leh game hrang hrang Spin the wheel, Ball Kick, Dart Game, Cup Game, Ball Score, Photo Booth, Talent Hunt leh Bow and Arrow-te hmangin naupangte hun an hmanpui a, Child Care Institution-te pawh in Stall hrang hrang rawn hawngin heng intihhlimna te hi naupangte tan man chawi lova hman theih turin an rawn chhawp chhuak a ni. He hun hi naupangte’n an hlut hle a, Mamit khawpui chhunga naupang thahnem tak an kalkhawm a ni.