518/2025-2026

Lawngtlai the, 21st May 2025: Vawiin chawhnu dar 1:00 khan Pi Jane R Ralte, Project Director, Mizoram State AIDS Control Society (MSACS) leh a thawhpuite leh Lawngtlai District AIDS Prevention and Control Committee (DAPCC) chuan DC Conference Hall- ah  thutkhawm an nei a.  Pu David Lalrinawma, Addl.DC, Lawngtlai chuan thutkhawm hi a kaihruai.

Pi Jane R. Ralte,  Project Director, MSACS chuan thutkhawmin  Lawngtlai District tana  hmasawnna tha tak a hrinchhuah ngei a beisei tih tarlangin, khawtlang leh kohhran ten tha taka an thawhpuinaah  lawmthu a sawi a. Mizorama HIV/AIDS hluar zel chu Mizoram Mipuite harsatna a ni tiin, a bik takin Prevalence rate a la sang fal nalh chu ngaihpawimawh a tul takzet a ni, a  ti. Lawngtlai District chu  tun dinhmunah  Mizoram District zinga High Priority awm lohna  niin a lawmawm hle a, chutih rualin hight priority-  a kai loh nan Khawtlang,  Kohhran leh NGOs-  te  tan tlan tlat a ngai a ni, a ti. Pi Jane R. Ralte chuan Mipat hmeichhiatna hman fimkhur a tul thu leh hriau intawm a pawi zia tlangaupui tura  sawmin,  Mipui nawlpui zingah nasa leh zuala HIV hrik test-  a pawimawh thu leh Mipuite zirtirna kawnga theihtawp chhuahpui turin a sawm nghal  bawk.

Dr Remlalnghaki, District AIDS Control Officer (DACO), leh  Dy.CMO ni bawk chuan District AIDS dinhmun tlangpui tarlanna a nei a. Kum 2024-2025 chhung khan Lawngtlai District- a  sample 2359 endik zingah HIV natna hrik kai - 111 lai  hmuhchhuah a ni a, hei hi za zelah 4.71 a ni, a ti. Raipuar hmeichhia 1621 endik zingah HIV hrik- 4  hmuhchhuah niin hei hi za zelah 0.25 a nih thu a sawi.  HIV hrik kai tamna ber chu mipat hmeichhiatna atang niin, a pahnihnaah hriau (syringe) inhman tawm atangin a ni, a ti bawk.  Dr Remlalnghaki chuan MSACS- in  Syringe exchange programme an neih te, Condom sem te leh awareness an pek thin te chu mipuiin  an ngaihven a, tha taka an zawm theuh theih nan kalkhawmte chu tanrualpuiah a sawm nghal a ni. 

Vawiin thutkhawmah hian Lawngtlai  District AIDS Prevention and Control Committee (DAPCC)  Member- te an telkim tha hle a, Zawhna leh chhanna hun hman nghal a ni bawk.