Mizoram State Cooperative Union (MSCU) chuan vawiin khan Vanapa Hall-ah General Assembly vawi 26-na an hmang a, Cooperation Minister Pu J.H.Rothuama chu Khuallian a ni.

Assembly hawnna inkhawm MSCU President Pu Lalnunsanga kaihhruaiah Khuallian chuan khawvel ram tam tak te chuan an sum leh pai dinhmun chawikawn nan Cooperative an hmang tangkai em em a, Mizoram-ah erawh kan hmelhriat tan chauh avangin a pawimawhna kan la hrethiam pha lo deuh a, chuvangin tun aia nasa zawka tan lak a ngaih thu a sawi a ni. Kum 30 chuang Mizoram-ah Cooperative hi awm tawh mahse vawiin thleng hian kalphung felfai leh Dan tha siam a la ni lova, sorkar pawhin hei hi ngaimawhin hemi lamah tan a la mek a, Cooperative Development Council pawh din a nih tawh thu a sawi bawk. Tun thla June ni 25-26 chhunga New Delhi-a Indian Cooperative Congress-ah Khual Zahawm chan changin a tel ve tur thu sawiin Pu J.H.Rothuama chuan sorkar laipui pawhin cooperative hi mihnuaihnung zawkte khaichhuah nan a tangkai zia hriain hma a la mek zel a ni, a ti. India President Pu Pranab Mukherjee Khuallianna tur Cooperative Congress-ah hian Mizoram Cooperative tihchak nan leh tanpuina sum mamawh chungchangte pawh thlen theih ngei a beisei thu a sawi a ni.

Cooperative Society hrang hrang intelkhawmna Mizoram State Cooperative Union hi 29.3.1975 atanga din tawh a ni a, tunah hian MSCU hnuaiah hian thawktu 36 an awm mek a ni. National Cooperative Union of India (NCUI) nen tangkawpin state leh district level-ah Cooperative Seminar vawi engemawzat an huaihawt tawh a, hmeichhia leh zirlai te tan pawhin Cooperative Training vawi engemawzat an lo nei tawh bawk a ni.

Vawiin MSCU Assembly-ah hian kum 2013-2018 chhunga hruaitu turte an thlang a. Sorkar laipuiin Dan thar a siam angin rampumah hruaitu thar term hi kum 5-a a pawhseih angin tun atanga an hruaitu thlan te chuan kum 5 chhung an hna an chelh tawh dawn a ni.