Mizoram State Commission for Women & Mizoram State Legal Services Authority huaihawtin hmeichhe kaihhnawih Dan leh Hrai inzirtirna chu vawiin khan Khawbung Community Hall-ah neih a ni a. He hun hi Mizoram State Commission for Women Chairman Pi Vanlalawmpuii Chawngthu chuan a hmanpui a ni.

Legal Awareness Campaign hawnna thuchah sawiin Pi Vanlalawmpuii chuan hmeichhiate chu ram rorelnaah hmeichhe chanvo (seat reservation) bak dinhmun pawh luah thei tura tan lak a pawimawh thu sawiin Mizo mipate thinlungah pawh hmeichhe chunga rinna an nghah ngam tak tak theihna tura hmeichhiate pawhin an theihna leh finna nasa zawka hmang turin kal khawmte a chah a. Hmeichhiate zahawmna vawnhim a nih theihna tura hriat tur tul hrang hrangte a tarlang bawk.

He hunah hian Resource person Pu T. Lalnunsiama, Advocate, chuan Human Trafficking, Protection of Children from Sexual Offences Act (POCSO Act) leh inchhungkhura hmeichhe chunga hleihlenna (domestic violence) chungchang a zirtir a. Prof. Zokaitluangi, MZU chuan chhungkaw khawsakho leh khawtlanga nunho dan tha (positive living) chungchang a zirtir bawk a. Hriatfiah duh nei tan zawhna leh chhanna hun neih a ni bawk.

Legal Awareness Campaign-ah hian Khawbung leh Zawlsei atangin kohhran hruaitu, NGO, VC, Sawrkar hnathawk, Zirtirtu, Angandwadi worker, nu leh pa leh Higher Secondary School zirlai naupang te an tel a. CDPO Pi Lalhmachhuani, Khawbung ICDS Project-in he hun hi a hmanpui bawk a ni.

Tukin khan Mizo Hlakungpui Mual Committee chuan MSCW Chairman Pi Vanlalawmpuii hi Hlakungpui Mual-ah kawmna hun neiin Hlakungpui Robawm an tlawhpui bawk a ni.