2435/2025-2026

AIzawl the 28th, November, 2025 : Vawiin khan FCS&CA Department-a thawktu pawl lian ber Mizoram Supply Executive Association (MSEA) chuan General Conference vawi 15 na Tourist Lodge, Chaltlang ah an hmang a, he hun hi FCS&CA changtu Minister, Pu B. Lalchhanzova chuan Khuallian niin a hmanpui a. Khuallian bakah hian FCS&CA Secretary, Pi Teresy Vanlalhruaii leh Director, Pi Saizikpuii te chuan he hun hi Khual Zahawm leh Khualtha niin an hmanpui bawk.

Chawhma lam hun chu Pu C.C. Sakhawliana, MSEA President leh DCSO Champhai in a kaihruai a, chawhma lam hunah hian Palaite inlawmna, Secretary report tawi bakah, Kal tate sunna leh pension te thlahna hun hman a ni. He hunah hian Khualllian Pu B. Lalchhanzova chuan MSEA chu supply department ang pawha pawl lian leh pawimawh ber a nih thu leh, thawktute chu dik taka thawk turin a chah a. Khuallian chuan mipuiten Minister tha leh chak anga min hriatve na hi, thawhpui te thahnemngaihna vang a ni  tih thu a sawi a, Supply department chu department ropui tak, mipuite eitur petu kan ni a, chuvang chuan a thawktu te kan pawimawh hle a, thawktu te chu rilru hrisel tak pu tur leh a tihdan tha ber zawng zel turin a chah a, thawktu ten harsatna an neih an gang chu engtik lai pawha ngaithla tura a inpeih reng thu a sawi bawk. Minister Pu Chhanzova hian Mizoram State Special Ration Package (MSSRP) scheme hnuaiah ration card 50000 atanga nuai 1 a tihpun tum anih thu te, Mizorama Loneitu te atanga an buhfai tharchhuah sorkar in lei a tum thu te a sawi bawk. Khualzawhawm FCS&CA Secretar, Pi Teresy Vanlalhruaii chuan MSEA members te chu department a thawktu lian ber, department VIP te an nih thu sawi a. Tin, MSEA members te chu Mizoram chhung kilkhawr ber ber a thawktu an nih thu leh department hmel lanna ber an ni a, dik tak leh taima taka mipui tana thawk zel turin kalkhawmte a chah bawk a ni.

Chawhnu lam chu Hruaitu thar thlanna hun atan leh rorelna neihna hun atan hman a ni a, rorel agenda langsar deuh zingah:- 

1) FCI in manual a storage loss & transit loss write-off provision a neih ang hi Supply department-in a hman ve theih nan hmalak ni rawh se, tih te,

2) Supply Department-a pawl pahnih thuang hniha kal Executive line leh Accounts line te inchhunfin dan tur draft proposal hi sawi ho ni rawh se, tihte bakah, 

3) DCSO posts – Kolasib, Serchhip, Lawngtlai & Mamit post te hi post upgrade tura Sorkar-ah dil ni rawh se tihte a tel a ni.

Vawiin MSEA General Conference vawi 15 na ah hian Districts hrang hrang atangin thawktu mi 88 vel an tel thei a ni.