1610/2026-2027

Aizawl dated 31st July 2026: Mizoram Sawrkar flagship Scheme Bana Kaih Scheme Phase ii kalpui meka dilna lutte endik chhunzawm zel a ni a. Vawiin khan Planning & Programme Implementation Department Committee Room-ah Mizoram State Project Coordination Committee, Bana Kaih Scheme Implementing Department atanga Nodal Officer-te leh Partner Bank; SBI, MRB, MCAB hotute an thukhawm a. Bana Kaih Scheme loan dilna lut 68 leh Chief Minister Special package dilna 1492 te chu endik a ni.

Thutkhawm hi Dr. KC Lalmalsawmzauva, Vice Chairman, MSPCC leh Adviser to Chief Minister (Implementation of Handholding Scheme) chuan kaihruaiin, kuthnathawktute kaih chhuahna Scheme, thiamna leh theihna nei mi taima leh tum ruhte eizawnna bultanna tur leh ram tih hmasawnna kawnga hmanraw tangkai tak, Bana Kaih Scheme hlawhtlin lehzualna turin dilna rawn lutte chu uluk taka endik a pawimawh thu a sawi a. Dilna lut thlitfim hna chu a hun taka kalpui a nih theih nan leh Sawrkar thawhpui theih tur Progress Partner tha thlanchhuah ngei a nih theih nan Implementing Department-a Nodal Officer-te inpekna a pawimawh thu a sawi.

Vawiina Chief Minister Special package dilna 1492 endik atang hian AH & Veterinary Department atanga dilna tam berin dilna 872 a lut a. Commerce & Industries Department hnuaiah dilna 504 a lut bawk a ni. Bana Kaih Scheme Loan dilna lut 68 endik a ni bawk.

Thutkhawm ah hian Bana Kaih Scheme hnuaia dilna hrang hrang endik a nih bakah Postal Department nena thawhho dan turte, Bana Kaih Scheme kalphung tih changtlun lehzualna tura 'Last Mile Connectivty' kalpui dan turte, Implementing department te hnathawhna senso pek dan thlirletnate neih a ni a. Bana Kaih Scheme hnuaia Progress Partner te hmalakna enzuina tur leh mipui hnena scheme kalphung zirtirna, Documentation & publicity kalpui dan turte enho a ni a. Handholding Mela buatsaih dan tur te, Handholding Scheme Phase III kalpui dan tur bakah, loan pek tura dilna pawm tawh, chhan hrang hrang avanga Bank lamin an la pekchhuah theih loh dilna 29 pawh uluk taka enho a ni bawk.