National Rural Livelihoods Mission zulzuia din Mizoram State Rural Livelihoods Mission (MSRLM) chuan vawiin khan Executive Committee meeting New Secretariat Conference Hall-ah Secretary Rural Development Department Pu K Riachho IAS kaihhruaina hnuaiah an nei a. Executive Committee ah hian Rural Development, Agriculture, Horticulture leh Industries Department aiawhte bakah NABARD leh SBI aiawhte pawh an tel a ni.

Meeting ah hian MSRLM inrelbawl nan leh Mission in hnathawktu hrang hrang a mamawh dan te zau taka an sawiho hnu ah, lak zat tur leh lak dan tur an rel a, hnathawktu tur te hi a rang lama lak nise an ti bawk. Mission in sum a hman dan tur khaihhruaina lailawk ‘Interim Financial Regulations 2012’ chu meeting ah hian uluk takin an sawiho hnu a, hman nghal tura pawm a ni.

Mizoram State Rural Livelihoods Mission ah hian Pu K Riachho IAS chu Mission Director a ni a, Pu Johny T. O chu CEO a ni.

National Rural Livelihoods Mission (NRLM) hi June 2011 khan Sorkar Laipui-a Ministry of Rural Development in thingtlang mipui ten eizawnna ngelnghet an neih theih nan leh thingtlang-a mirethei te chawikan nan programme a kalpui mek Swarnjayanti Gram Swarozgar Yojana (SGSY) tun aia changtlung leh huap zau zawka kalpui a nih theih nan a duan thar a ni a. MSRLM thawhkhatna hi Kolasib District-a Thingdawl leh Bilkhawthlir RD Block leh Serchhip District-a leh Serchhip leh East Lungdar RD Block ah te kalpui tum phawt a ni.

National Rural Livelihood Mission peng khat North East Rural Livelihood Project chu World Bank tanpuina in Hmarchhak bial bik ah Ministry of Development of North Eastern Region kaihruianna hnuaiah state pali – Mizoram, Nagaland, Sikkim leh Tripura-a District pahnih theuh ah te kalpui tum a ni bawk. Mizoram ah chuan North East Rural Livelihoods Project hi Aizawl leh Lunglei District ah te kalpui tum a ni.