4706/2025-2026

Aizawl, the 5th of March, 2026: Vawiin chawhnu dar 2:30 khan Mizoram State Sports Council leh Lai Autonomous District Council te chuan Residential School, Lawngtlai inhlanchhawnna tur Memorandum of Agreement chu MINECO a Pu Lalnghinglova Hmar, Minister of State, Sports & Youth Services Department, Office chamber-ah an ziak.

Lawngtlai a Residential School hi Pradhan Mantri Jan Vikas Karyakram (PMJVK) hnuaia MSSC jn Rs. 3461.7 lakh senga a sak a ni a. Inremnaah hian neitu nihna Leh a enkawl hna chu LADC kutah hlan niin, anni hian a enkawl leh hman zui chungchangah thu an nei dawn a ni. Inremna a thu dah zingah hian District Sports Committee (Lawngtlai), Mizoram Football Association, Lawngtlai District Football Association leh Central Young Lai Association(CYLA) ten state emaw district level tournament buatsaih nan an hman duh chuan man chawi lovin an hmang thei dawn a ni.

He hunah hian Sports Minister, MSSC President ni bawk Pu Lalnghinglova Hmar chuan thu sawiin, “Lai mipuiten tangkai taka he Residential School hi an hman kan duh a, an hman ngei theih nan LADC kutah dah a ni. Mimal hlawkna emaw, politics khelh nan emaw a hmun leh bungruate hman leh laksawn phal a ni lo." tiin, thahnemngai leh duat taka enkawl turin LADC hruaitute chu a sawm nghal a ni.

MoA ziahnaah hian MSSC aiawhin Pu Henry C. Lalrawnkima, Secretary leh Amy Ramchhani, Administrative Officer te’n hming an ziak a. LADC aiawhin Pu K. Lalthanzara, Executive Secretary leh Pi Lalhminghlupuii Thangen, Deputy Resident Commissioner, Lai House, Aizawl te’n an hming an ziak ve bawk.