Mizoram State Tobacco Control Society (MSTCS) chuan vawiin khan I & PR Conference Hall-ah The Cigarettes & Other Tobacco Products Act, 2003 hnuaia Section 4 zawm dan (a that leh that loh) zirchianna an neih atanga an thil hmuhchhuahte tarlanna hun an buatsaih. He hun hi Dr. Lalbiakkima, Director, Hospital & Medical Education chuan kaihruaiin Dr. Jane Ralte, State Nodal Officer chuan tun tumah an zirchhiana atang zuk leh hmuam chungchangah, Section 4 kaihhnawihte District hrang hrang in an zawm that dan leh thil hrang hrang an hmuhchhuahte a tarlang a ni.

COTPA Section 4 zawm dan zirchianna ‘Compliance Study : Section 4 of COTPA, 2013’ hi kumin May leh June inkarah khan District hrang hranga hmun 860 te fangkualin neih a ni. Hmun hrang hrang an fankual te hi – office; zirna in; damdawiin; restaurant leh hotel te; hall leh bazar te leh hmun dangte an ni. He zirchiana ah hian thil paruk an zir deuh bika chungte chu – meizuk phallohna thuziak a in tar em tih te; thuziah tar chuan COTPA in a sawi ang zawm a ni em tih te; puipuinna hmunah meizu an awm em tih te; chung hmunah te chuan meizial bung a awm em tih te; meizukna hmanrua(lighter, nawalh leh ashtray) a awm em tih te leh chung hmunah te chuan meizial rim hriat tur a awm tih te an ni.

Hetiang zirchiana hi MSTCS chuan 2009 leh 2011 te khan an lo buatsaih tawh a ni.

Kum 2009 atanga chhut chuan COTPA Section 4 dan zawm hi a sang tawh viau in mipuiin an zawm tha hle. Kumina zirchiana ah hian Serchhip, Mamit, Kolasib leh Champhai te chuan Section 4 hi an zawm tha bik hle nia tarlan a ni. Heng District pali ah te hian an zirchian hun chung hian puipuina hmuna meizial zu (active smoking) hmuh tur an awm lo. Puipuina hmuna meizu kum 2009-a za zelah 61.7 ni thin chu 2013-ah chuan za zelah 7.9 ah a tlahniam a ni. Zirchiana atanga a lan dan chuan office, thingpui dawr leh bazaar te hi hmundang nena tehkhinin Section 4 an zawm tha lo a, hmalakna tur a awm nia tarlan a ni bawk.