Vawiin khan Forensic Laboratory Building, New Secretariat Complex-ah Excise & Narcotics Dept. Inspector 10 leh Sub-Inspector 15 te tan ‘Scientific Analysis of Alcoholic Liquor’ tih thupui hmangin kar khat awh tur training hawnna hun hman a ni. He Training hian a tum ber chu MLTP Act Amendment 2013-in a sawi anga Excise & Narcotics Department Officer-te hnena Zu (alcohol) finfiah thei tura thiamna pek a ni.

Training hawnna inkhawmah hian Pu Zorammawia, IPS, IGP chu khuallian niin, kalkhawmte hnenah chuan zu finfiah kawnga an mawhphurhna chu hre renga, training an dawn tur chu hmang tangkai turin leh, thutlukna siam kawnga fimkhur taka thawk turin fuihna thu a sawi a ni.

Mizoram in zu khapna Dan, MLTP Act, 1995 a hman tirh atang tawhin Zu nia rinhlelh mante reng reng hi Zu a nih leh nih loh finfiah tur leh a chakna, percentage finfiah turin Forensic Laboratory-ah thawn thin niin, finfiah a nih hnu ah Forensic Report hmang hian Court-ah thubuai thehluh thin a ni a. MLTP Act Amendment 2013 chuan Zu nia rinhlelh mante chu Forensic Laboratory-a thawn kher ngai tawh lo turin Excise & Narcotics Dept. Officer-te leh Police Officer-te tan Zu finfiah thei tura thuneihna nei turin Expert nih theihna kawng a siam a. Expert ni thei tura an mamawh thiamna pe turin he training hi buatsaih a ni.

Forensic Laboratory-ah hian Zu Case ringawt 439 kumin October thleng khan finfiah tawh a niin, hemi bakah hian tunlaia damdawi kheh case lar tak, Pseudoephedrine leh Methamphetamine kaihnawih ringawt pawh Case 57 chuang endik a ni tawh a. MLTP Act Amendment 2013 a taka hman a nih theih hunah chuan Forensic mithiamte phur a zan phah sawt bakah case finfiah chhung pawh a reiloh phah tura ngaih a ni.

Training hian ni 2 – 5 December, 2013 chhung a awh ang a. Zu finfiah dan leh a kaihhnawih hrang hrang zirtir a nih dawn bakah, training tawp ni ah exam neih a ni ang.