Nimin khan Thalfavang Kut 2013 ni hnihna leh a tawp ni ni bawk chu Hmuifang Tourist Resort kawt zawlah hman a ni a, Pu K. Lal Nghinglova, IAS, Commissioner cum Secretary, Tourism Department chuan khuallian niin a hmanpui.

Pu K. Lal Nghinglova chuan Thalfavang Kut hmang tura lokal mipui te duhsakna hlanin, rilru fim pua, pipute sulhnu hlut thiam a pawimawh thu a sawi. Pu Biakthanmawia, Joint Director, Tourism Department chuan Thalfavang Kut in a tum ber chu Mizo nun zemawi tih lan leh thalai te talen neih hrang hrang te pholan bakah khualzinte hip a ni, a ti.

Thalfavang Kut hi hnihna ah hian Mizo Cultural Organisation (MCO) bultumin hnam lam chi hrang hrang – Cheraw te, Siktuithiang leh Fahreltawk te entir a ni a; Mizo zaithiam hrang hrangten Thalfavang Kut hmangtute an awi bawk. Thalfavang Kut-ah hian Mizo Photographers’ Society chuan Mizoram-a a vawi hnihna atan Photo Exhibition an buatsaih a; Photo Exhibition-ah hian Mizoram hmel lanna thlalak mawi tak tak 50 zet tarmawi a ni a, hlutsaktu an tam hle a ni. Thalfavang Kut hi Hmuifangah vawi 3 nghah a ni tawh.

Nikum khan Mizorama ramchung khualzin mi 64,000 vel leh rampawn khualzin mi 700 vel an rawn zin nia chut a ni a, hengte atanga Department-in sum a lakluh chu nuai 170 vel a ni.