Vawiin khan Chief Election Commissioner Pu Ashwani Kumar hovin I&PR Auditorium-ah Election hotute leh thuthar thehdarhtute chuan MLA Inthlanpui neih zawh tak chungchang sawihona hun an hmang.

CEO chuan sawihawnna hun hmangin, inthlan tluang taka neih a ni thei chu lawmawm a tih thu a sawi a. Vote thlak tur a kal an thahnem hle tih tarlangin, media lam mite leh tlawmngai pawl hrang hrang ten thahnem ngai tak hma an lakna zar a nilo theilo a ni a ti. Mamit-ah vote 85.59% tla in District hrang hrang khaikhin a vote tlak that berna a ni a. Vote 85.45% tlakna Lunglei in a dawt a, pathumna chu Serchhip niin, vote 84.77% a tla a ni. Heng chhiarnaah hian Postal Ballot a tla chhiar tel a la nilo a ni.

 Jt. CEO Pu H. Lalengmawia chuan Model Code of Conduct bawhchhiat chungchangah case report tur pawh a tam lo hle a. Hei hian Mizoram mipuiten dan an zah zia a tilang a ni a ti a. Bru vote thlaktir kawngah Tripura Sorkarin theihtawp a lo chhuah a, an lo buaipui dana an lungawi thu a sawi bawk.

EVM dah khawmna Strong Room pawh fimkhur taka ven zawm zel a nih thu leh, vote chhiar ni atana inpuahchahna pawh tluang taka kalpui zel a nih thu te sawi a ni.