All India Radio, Lunglei leh YMA Sub-Headquarters, Lunglei tangkawp buatsaih ‘Sikpui Kut 2013’ chu vawiin khan Lunglawn Mual, Lunglei-ah hman a ni a, Lunglei Addl. DC Dr.Andrew H.Vanlaldika chu Khuallian chan changin he hun hi a hmanpui a ni. Sikpui Kut-ah hian Pu C.Lalrosanga, Adll. Director General (P/A), AIR & DD bakah Pu Lalneihkunga Khobung, Station Director, AIR Lunglei, sorkar officials te leh YMA Sub-Headquarters hruaitute pawh engemawzat an tel a ni.

Kut hawnna Pu K.Lalzarliana, TREX, AIR kaihhruaiah Dr. Andrew H.Vanlaldika chuan AIR leh YMA ten hetiang Kut ropui leh hlimawm tak an buatsaih theih chu a lawmawm hle a ni, a ti a. Khawvel hmasawn zelah Mizo hnam ziarang leh kalphung te chu thangthar ten an theihnghilh tih hlauhawm khawpin khawthlang leh khawchhak ram changkang zawkte khawsak dan Mizoten kan entawn nasa hle a, Kut chi hrang hrang kan la hmang thin hian Mizo culture a tinungin a vawnghim zel a ni, a ti. Pi leh pu ten awmze nei takin Kut an hmang thin a, chu chuan Mizo hnam hrang hrang khaikhawmtu leh Mizo nihna siamtu hmanraw pawimawh tak a nih thin thu a sawi bawk.

Sikpui Kut 2013-ah hian Mizo hnam ziarang pholanna thil chi hrang hrang – Hlado, Darbu lam, Mizo ladeh, Chheih zai, Cheraw, Sarlamkai, Chawnglaizawn, Zotuithiang lam te entir a ni a; hmanlai pi-pu te hun atanga vawiin thleng Mizo inchei dan pholanna ‘Costume Parade’ pawh entir a ni bawk. Heng item-te hi Lunglei khawchhunga YMA leh MHIP Branch hrang hrang ten mipui kalkhawm hmaah an rawn entir a ni.