Nizan khan Mizo Students’ Union 18th General Conference hmawrbawkna ‘Palai Thlah’ zan hman a ni a, Power & Electricity Minister Pu R Lalzirliana chu khuallian a ni a Minister of State for Food, Civil Supplies & Consumer Affairs Department Pu K Lalrinliana chu Uaptu niin hun an hmanpui.

Minister Pu R Lalzirliana chuan MSU programme siam a mizo hnam lam dik tak an entir chu lawmawm a tih thu sawiin, hnam lam leh thuam thenkhatte chu tunlai mila her danglam a tam thu a sawi a, hnam ziarang humhalhna kawngah hnam lam leh thuam te a dik taka vawn a pawimawh thu leh zirlaiten ngaihhlut nachang an hriat a tul thu a sawi bawk. Pu R Lalzirliana chuan lehkhathiam tangkailo, kut hnathawh hreh tawk vel leh Sawrkar hna chiah zawm tum a lehkha zir lo turin a fuih a, kan thiamna leh theihna te chu kan ram leh hnam leh khawtlang tan a tangkai a hmang thin turin a fuih. Khuallian chuan zirlaite chu nu leh pa leh aia upate thu ngaihchan thiamte, hunbi vawn dikte, intodelh tum te leh hna thawhna a rinawm mi chu hlawhtlinna an hmuh thin thu a sawi. Minister chuan MSU 18th General Conference a chhimtute chu kawng engngemaw tal a hmasawnna hawn tum turin a chah a, thatlai hun hlim tak leh him taka hmang a, ram leh hnam venhim leh chawisanna kawnga an mawhphurnate hria a mi tangkaia inzir chhuak theuh turin a fuih bawk.

Pu K Lalrinliana, Minister leh bialtu MLA ni bawk chuan zirlaite chu thiamna ziktluak, mahni bakah ram tana tangkai thiamna neih tum turin a chah a, “Ram leilung hausakna haichhuahna kawnga thiamnate leh khawvel hmun hrang hranga mite hip thei tur khawp a kan ram a hausakna kan neihte hi kan hman thiam a pawimawh a ni”, a ti a, chutiang kawnga ngaihtuahna senga hma la tur chuan zirlaite an pawimawh thu a sawi bawk.

MSU 18th General Conference Palai thlahna hun hi Pu B Lalkhawngaihzuala, Treasurer in a kaihruaia Pu Vanlalliana, President in thusawina hun neiin Pu Laldinsanga, President Sub-Hqrs., Bairabi in palaite thlahna thuchah a sawi bawk a ni. Govt. Johnson College leh Govt. Aizawl College Cultural Club ten hnam lam entirin Women’s Polytechnic, Aizawl ten an thiamthil entirna hun an hmang a zaithiam ten zaiin kalkhawmte an awi bawk a ni.