Nimin khan Home Minister Pu R. Lalzirliana chuan Mizo Students Union General Conference, an kum 10 tlin Tin Jubilee lawmna ni bawk chu Tlabungah a hmanpui.

Pu R. Lalzirliana chuan zirlai pawl chu zirlai te tana ding a nih angin zirlaiten innghahna tlakah an ngai em tih leh rin tlak, zui tlak leh ngaihsan tlakah an ngai em tih zirlai pawl hruaituten an ngaituah nawn fo a tul a ni, a ti. Mizo zirlaite hmasawnna tur ngaihtuah tu leh ram leh hnam humhalh kawnga thahnemngai tak zirlaite hian hnam leh ram vei dan tha ber chu mahni zirlai bel taka thiam a, mi hman tlak ni tura inzir a nih tih an hriat a tul a, zirlai te chuan thil dang zawng aiin zirna an dah pawimawh hmasa ber tur a ni, a ti. Tunlai khawvelah chhawrtlak leh hmantlak thiamna neih a tul tawh a, Degree sang tak neih ringawt piah lamah khawvelin eng thiamna nge a mamawh tih ngaihtuah ran chunga inzir a tul tak zet a ni, Minister chuan a ti a. Zirlai te chu ram leh hnam tana tangkai ni tura an ngaituahna seng tur leh mihring nun hlutna chu a rei zawngah ni lovin a tangkaina lamah a innghat zawk a ni tih hre reng turin zirlai kalkhawm te a fuih a ni.

Pu R. Lalzirliana chuan Tlabung khua chu ram dang nena insumdawn tawnna Border trade hmunpui tur niin Bangladesh te nena insumdawn tawnna kawtchhuah pawimawh tak la ni mai tur a ni, a ti a. Bangladesh-ah Chief Minister Pu Lal Thanhawla leh Trade & Commerce Minister Pu Lalrinliana Sailo te an zin tawh thu leh an sawmna ngaipawimawh a Chittagong Hill Tract bialtu MP, Bangladesh Minister of State ni mek chuan tunhnaiah Mizoram tlawh a lo zin a tum thu a tarlang a, hei hian ramri hrula Bangladesh nena insumdawn tawnna in hma a sawn phah hle a beisei thu a sawi bawk.

Zanina tiak tur MSU General Conference-ah hian Parliamentary Secretary Pu H. Zothangliana chu Jubilee Pa a ni a. Pachhunga University College Associate Professor Dr. JV Hluna leh MZU Asst. Professor Lallianchhunga ten \"Ram leh Hnam himna zirlaite kutah\" tih thupui hmangin thu an sawi a ni.

Home Minister hian chhim bial a zin chhung hian Lunglei a SP office sak thar bakah Tlabung a Police Station leh Fire Station te a tlawh a. Chhim bial huamchhunga BDO te ko khawmin Lunglei Tourist Lodge-ah infuih tharna hun tha tak a hmanpui bawk a ni.

Mizo Students Union General Conference hmanga zin Home Minister Pu R. Lalzirliana hian Lunglei District a Nunsuri khua a tlawh nghal a. Minister of State Pu Nihar Kanti Chakma leh Nunsiri khawtlangin lo dawngsawngin Cultural Programme hlimawm tak an lo buatsaihsak a ni.