‘Zofate Inpumkhat; Mizo Zirlaite Mawhphurhna’ tih thupui hmangin Mizo Students Union General Conference tum 12-na chu N. Vanlaiphai-ah ropui takin hman a ni.

Nimin khan he khawmpui a khuallian Pu P.L. Thanga, Member Secretary, Mizoram State Planning Board leh Vice Chairman, NLUP Implementing Board chuan a hmanpui a, zirlai kalkhawmte hnenah Ram leh Hnam tana tangkai thei khawp ni turin an zirlai tha taka zira thiam tak tak turin a chah a ni.

Pu P.L. Thanga chuan zirlaite hnenah hnam rohlu leh hnamziate humhalh a tul thu a sawi a, Mizo Lal te chu India ram Lal tamtak te tlawm hnu ah pawh tlawm duhlova, sap ho thih thlenga do ngam Martyr te an nih thu sawiin, historian tam takin ‘mi lu la hnam’ an tih mai ang an nilo, Mizoram an chhan vang a ni, tiin a sawi.

Ram hmasawnna hmalakna chungchang sawiin Sorkarin NLUP a siam chu, mirethei leh kuthnathawktute chawikanna leh intodelhna neihnan a nih laiin, Mizoram tuihna, ramngaw leh nungchate humhalh nan pawimawh em em a nih thu sawiin, lo hal leh ramngaw tih chereu kan bansan loh chuan tun atanga reilote ah ram lum, chenna tlaklo leh tui awmlohna hmunah kan siam mai a hlauhawm thu a sawi bawk a ni.

MSU General Conference ni 6 - 8 November, 2013 N.Vanlaiphai-a neih hi District hrang hrang atanga member 1000 chuang kalkhawmin an hmang a ni.

Nimin zing dar 7:30 khan N.Vanlaiphai khawtlang hruaitute nen Pu P.L. Thanga leh NLUP Implementing Board hruaitute chuan inkawmna an nei a, hetah hian NLUP kalpui mek leh kalpui zel dan tur Exit Protocol chungchangte sawiho a ni a, khawtlang hruaitute chuan hmalakna enin hlawhtlinpui ngei a nih theih an beisei dan te, hmalak zel dan turte an sawi a, Serthlum bikah phei chuan tun atanga kum reilote ah N.Vanlaiphai hian an khua mai nilo, Mizoram khaw hrang hranga thawn chhuah tham serthlum an thar ngei an beisei tih an sawi bawk.