Mizo Students’ Union chuan vawiin chawhma dar 11:00 khan Vanapa Hall-ah Mizoram University hnuaia Under Graduate Degree Course hrang hrang exam-a topper mi 19 te hnenah Zofate zinga zirna lama mi hmasa leh thawhhlawkte hming chawiin Award a sem a. Heng bakah Zofate zing a Mt. Everest lawn chhuak hmasa ber, Pu David Zohmangaiha leh Based Camp Manager, Pu Vanlalliana te hnenah chawimawina a hlan bawk. He hunah hian Parliamentary Secretary Pu Lal Thanzara chu khuallian niin hun a hmanpui a ni.
Pu Lal Thanzara chuan MSU chu zirlai te hlawhtlinna ngai pawimawh a chawimawina hun a siamsak thei chu lawmawm ati a. Topper te hnenah chuan an hlawhtlinna chu thil thleng satliah ni mai lovin, an thawhrim rah liau liau ani a ti. An zirna an chhunzawm zelna kawngah leh hna zawn thleng pawhin thawhrimna hi thlauhthla lo turin a chah a. Vawiin a kan zirlai te hi hun reilo tea kan ram hruaitu tur te anni a, chuvang chuan tun atanga nun uluk turin zirlai pungkhawmte chu a chah. Tunlai a Mizo te zinga taksa hrisellohna hrang hrang te hi ei leh in, zuk leh hmuam leh mipat-hmeichhiat lam a kan fimkhur tawk loh vang ani tih tarlangin, thangthar te chu heng kawngah hian fimkhur turin a chah bawk a. MSU te chu Sorkar kalsual tur veng a an hmalak thinna te chu sawilangin, rorelna dik nei tura hmalakna kawngah an thawk tha hle a ni a ti.
Tun Sorkar dinglai mek hmalakna te tarlangin, Parliamentary Secretary chuan, thalai te tuihalna chi hrang hrang, zirna lamah te, infiamna lam te ti hlawhtling turin hmalak mek ani a ti. Foreign Scholarship pawh khawvel huapa zirna hmun tha zawk a zirlai te an zir ve theih nan ruahhman mek a nih thu te, kan thenawm state dangin an ngaihtuah chhuah ve hma hauhva Education Reforms kalpui anih tawh thu te a sawi.
He programme ah hian zirlai titha te chu Chief Guest chuan Award a hlan a. Pu David Zohmangaiha leh Pu Vanlalliana te hnenah MSU President Zodinpuia chuan chawimawina a hlan bawk a ni.
MSU chuan Zofate zinga mi hmingtha te, zirna lama mi hmasa te leh thawh hlawk te hming chawia chawimawina Award a siam chhan hi sawiin, thangthar te leh zirlaite’n zirna lama kan mi hmasa te leh thawhhlawk te hian hun harsa tak leh hun khirhkhan tak kara hlawhtlinna an chang tih hria a, an mahni hre reng chunga zirna ngaipawimawh a, chhunzawm zel tur in beiseina leh chutihruala Zofate zinga mi hmingthate leh zirna lama mithawhhlawk leh mi hmasate hi thangthar ten nakin lawk a an theihnghilh mai loh nan leh chawimawi an phu vang hrim hrimin he chawimawina hi a hlan a ni.
Chawimawina Award hming chawitu te leh dawngtu te chu heng mite an ni:
Mizo – F. Lalzuithanga (PUC) - Paul Lalremruata Award
English – Henry Lalremruata (GSC) - Sangliana Award
Pol. Science – Lalrinngheta (HBC) - Prof. JV Hluna Award
History – Gilbert Zarzozela (PUC) - B. Lalthangliana Award
Geography – Lalmuankimi (PUC), Israel Lalrempuia (GANC) - R. Zatlaia Award
Economics – K. Vanlalhruaitluanga (PUC) - SR Vala Award
Sociology – Ruthy KC Lalchhanhimi (PUC) - Dr Kenneth Chawngliana Award
Education – Ian Laldinliana (GAC) - Lalhmasai Chuaungo Award
Public Administration – Benjamin Z. Renthlei (PUC) - Rev. Vanlalnghaka Award
Psychology – H. Vanlalbiakzauva (PUC) - Zoliana Royte Award
Geology – P. Vanlalhruaitluanga (PUC) - Dr. Lallenmawia Award
Physics – Lalrinkima (PUC) - Lallawmzuala Award
Mathematics – Zathuama (GZRSC) - Dr. LN Tluanga Award
Zoology – Mary Lalnunmawii (PUC) - Dr. Tlanglawma Award
Chemistry – Catherine S. Lalrampari (PUC) - Dr. R Lalrempuia Award
Botany – Lalhminghlui Renthlei (GZRSC) - Ramhluna Hnamte Award
Commerce – C. Lallianzami (HBC) - Bualhranga Award
Home Science – Lalhmangaihzuali (GZRSC)
