Vawiin chawhma dar 10:30 khan Serchhip DC office chamber ah, District Election Officer, Bawrhsap ni bawk Pi Juhi Mukherjee, IAS hovin kumin kum tawp lama Mizoram Inthlanpui lo awm tur atana Serchhip District-a Sectoral Magistrate/Officer tura ruatte chu an thukhawm a. Sectoral Magistrate te hi Serchhip District ah mi pasarih (7) ruat an ni a; a tul huna hman theih turin Additional Sectoral magistrate pahnih(2) dang ruat an ni bawk.
District Election Officer chuan Sectoral Magistrate te chu an hnathawh tur leh mawhphurhna te a hrilhfiah a, Election Commission of India kut-ke pawimawh tak an nih thu hrilhin, an bial chhung theuh te hrechiang tur leh a rang thei ang bera an bial chan tura ruat te fang chhuak turin a chah a. An mawhphurhna leh tihturte hriattirin harsatna an neih apiangte inthlahrung hauh lova hriattir thin turin a chah bawk.
Serchhip District chhunga Assembly Constituency pathuma Sectoral Magistrate tura ruat te chu :
1. C.Lalthuamliana, SDEO, Thenzawl : Thenzawl Sector [26-Serchhip (ST)]
2. Lalhmangaihi, CDPO, Serchhip : Serchhip Sector [26-Serchhip (ST)]
3. Vanlalvuana, SDO, PWD, Serchhip : Chhiahtlang Sector [27-Tuikum (ST)]
4. S.T.Lalhmingmawia, DLAO, Serchhip : Chhingchhip Sector [27-Tuikum (ST)]
5. C.Lalthanzira, DPC, SSA : Khawlailung Sector [28-Hrangturzo (ST)]
6. Malsawmdawngliani, SDO, PWD, N.Vanlaiphai : N. Vanlaiphai Sector [28-Hrangturzo (ST)]
7. Lalnunthari, CDPO, E. Lungdar : E. Lungdar Sector [28-Hrangturzo (ST)]
Serchhip District chhungah hian vote thlak thei lo tur khawpa invauna emaw, inrikrapna emaw, tharum leh tihluihna hmanga inkhap emaw a awm ngai loh thu sawi lan niin, District Election Officer chuan Serchhip District hmingthatna chu chhawmnun zel anih theih nan leh Inthlanna felfai leh muanawm a awm theih nan theihtawp chhuah turin mawhphurhna chelhtu zawng zawngte a sawm nghal bawk a ni.
Vawiin thutkhawmah hian Sectoral Magistrate thar te bakah Pu Lalsangliana, MCS, Additional DC leh Pu Lalhmansanga, MCS, Election Officer te an tel a ni.
