Vawiin khan Mizoram Tourism Development Authority (MTDA) chuan Tourism Minister leh MTDA Chairman ni bawk Pu S. Hiato hovin a office chamber-ah an thukhawm a, he meeting-ah hian Parliamentary Secretary Pu H. Zothangliana pawh a tel a ni.

Minister Pu S. Hiato chuan Tourism Department hmalakna tawiawm leh tichaktu a MTDA tangkai taka a kal mek chu lawmawm a tih thu a sawi a. Tangkai lehzuala kalphung mumal tak a neih theihna turin member te ngaihtuahna hmang turin a ngen.

MTDA thukhawm chuan Tourist Lodge sak zawh tawhte hawn dan tur an rel a. Saitual Tourist Lodge chu May ni 16 ah hawn tum niin, Tourist Lodge E. Lungdar chu May ni 22 ah, Tourist Lodge N. Vanlaiphai May ni 23 ah leh a dang paruk (6) Bualpui NG, Darzo, South Vanlaiphai, W. Phaileng, Zawlnuam leh Sangau te chu June thlaa hawn tum a ni bawk. Chalfilh leh hmun dang panga (5) ami te hawng tura inbuatsaih tum bawk a ni.

MTDA chuan Aerosports hmasawnna atan cheng nuai 468.82 a hmuh chu he fund hi sanction a nih ang ngeia hman tum a ni.

MTDA sum RTI Act-a zawhna leh Minister-in Assembly-a a chhanna inmil lo anga sawi pawh Member te hrilhfiah an ni a. RTI Act zawhna hi January-ah chhan a ni a. MTDA sum (a pung nen) tlingkhawm zat zawh anih angin Rs. 1,46,28,540/- a chhan a ni a; Minister in Session-a a chhanna hi MTDA sum ‘tun dinhmunah’ tih zawh a nih angin senso hrang hrang paih hnua a la awm zat Rs.99,63,560/- a chhan a ni thung.