Samaritan Association for the Blind (SAB) enkawl Special Blind School (SBS) atanga kumin HSLC-a pass zirlai 6 te lawmpuina hun chu vawiin khan SBS Hall-ah Education Minister Pu Lalsawta hovin hman a ni. Result lawmnaah hian School Education Director Pu P.Lalchhuang leh Department hotute, SBS zirlaite leh an nu leh pa te bakah SBS Managing Board member te an tel a ni.

SBS HSLC Result lawmna inkhawm SAB Executive Secretary Pu Arsiliana kaihhruaiah Education Minister chuan pianphunga harsatna nei chunga Matric-a hlawhtlinna hmute chu tluk lo rim nam an ni tiin SBS zirlai 6 HSLC tha taka pass te chu thinlung takin a lawmpui thu a sawi a. India Hnam Pa Mahatma Gandhi chuan rualbanlote hi “pangpar mawi” tiin a sawi thin a, Mizote chu kan pi leh pute hunlai khan rualbanlote tih nawmnah leh chhaih ching hnam kan ni thin a, amaherawhchu tunlaiah chuan pianphunga rualbanlote chuan lainat leh tanpui an mamawh zawk a ni tih hriain pawl leh mimal ang pawhin tanpuitu leh hmangaihtu an ngah sawt a ni, a ti. Mihringte chuan harsatna eng eng emaw kan tawk theuh thin a, hetiang hunah hian inti paukhauha ‘tawlhlohpuan’  kan sin a ngai a ni, a ti. Education Minister hian Special Blind School tan Audio Bible pakhat leh Computer Set khat chu HSLC Result lawmpui nan a pe a, zirlai titha te hnenah lawmpuina a hlan bawk a ni.

HSLC Result lawmna programme-a tel School Education Director Pu P. Lalchhuanga pawhin duhsakna hlanin lawmpui nan Rs.1000/-  School Board hnenah a pe bawk.

Residential Special Blind School (Free Boarding & Lodging) hi zirlai 8 chauh neiin May ni 1, 2001 atang khan din tan a ni a. He School atang hian zirlai 20 laiin Matric exam tawhin an zinga 15 te chuan hlawhtlinna an hmu a. Kumin HSLC-ah zirlai 6 an exam a, an pass vek a ni; chungte chu : 1) Hamleta s/o Zorammawia, Bualpui 1st Div.; 2) Lalremchhungi d/o Sangchema, Niawhtlang 1st Div,; 3) Lalramnghaki d/0 Vanlalliana, Aizawl Venglai, 1st Div.; 4) Laltlanchhunga s/o Chullova, Daido 2nd Div.; 5) Vaitu s/o Zuali, Theiri 2nd Div. leh 6) Lalmuanpuii d/o Roluaha, Chhinga Veng Aizawl 3rd Div. te an ni.