854/2024-2025

Lunglei.19th.June.2024: Mizoram Thalai Kristian Pawl (MTKP) buatsaihin tukin khan Lunglei khawpuiah " Hriselna atana Tlana" tih thupui hmangin hun hman a ni.

MTKP rorel 2024 in a lo pass tawh angin hriselna atan hmalak tih khuhhawnna atan "Hriselna atana tlan" tih hun hi hman niin tukin zing dar 6:00 atang khan Lunglei khawpui chhim lam leh hmar lam atangin TKP member thahnem takte chuan tlanin Lunglei Venglai Tennis Court an pan khawm a, hetah hian hun hman a ni.

Inkhawm hi Rbt.F.Lalremruatpuia MTKP Vice President chuan kaihruaiin, Upa R.Lalrochama MTKP President chuan hunserh hmangin Krista leh Kohhran tan rilru hrisel leh taksa hrisel nei turin Pathianin taksa vawng thianghlim tura min tih anga kan nun angai tiin, taksa a hrisel loh chuan thlarau nun pawh a chak theilo a ti.

He hunah hian Pu James Miahlung Addl.D.C Lunglei chuan thu sawi bawkin, District Level Non-Communicable Diseases  (NCD) Committee pawhin hriselna kawngah Lunglei District in hma a sawn theihna turin ruahmanna hrang hrang an siam thu leh chumi tihlawhtling tur chuan theihtawp chhuah a ngaih tih a sawi a, MTKP ten hriselna kawnga hmalakna atan bul an tan chu lawmawm a tih thu sawiin, hriselna atana taksa sawizawi angaih thu leh kan taksa chu Pathian In a nih avangin kan vawn thianghlim angai tiin, kan hriselna atan taksa sawizawina hun kan insiam hram hram a tul a ti.

Dr.Lalrinthangi Dy.Chief Medical Officer Lunglei chuan thu sawi bawkin hmanlai kan Pi leh Pu te hun leh tunlai kan khawsak phung a danglam nasat avang leh kan ei leh in te kan thlak nasat avangin tunhmaa Mizo ten kan hriat ngailo ram changkang te chauhin an neih thin natna chi hrang hrang kan kai tawh a, ei leh in kan insum loh vang leh kan fimkhur loh avangin BP sang kan tam tawh em em a, a bik takin Chi kan ei tlem a tul a ti. Ruihhlo kan tih hian zuk leh hmuam zawng zawng hi a tel tih kan hriat a, kan sim a ngai a ti a, Cancer tamna ram kan nihna chhan hi ei leh in kan fimkhur loh vang leh zuk leh hmuam kan tih nasat lutuk vang a ni ti bawkin taksa hriselna atan Frozen Foods pumpelh a tul thu leh hriselna atan Pathianin min siam chhan ang ngeia nung tura thu tlukna kan siamna hun atan he hun hi i hmang ang u tiin kalkhawmte a sawm a ni.

He huna kalkhawmte hian MTKP Secretary Rev.F.Zorinkhuma kaihhruaina hnuaiah " Thalai Kristian Pawl member ten hriselna kawngah hmala turin vawiin atang hian ka intiam e, Vawiin atang hian hriselna pawimawh zia hriain taksa insawizawi pawimawh zia hriain theihtawp ka chhuah anga midangte zirtirtu nih ka tum tlat ang tihte leh hriselna atan ei leh in kawngah vawiin atang hian insum ka tum tlat ang tih te hmangin thu an tiam a ni. MTKP in hriselna kawngah hmalak nise ti a rorelna in a lo pass tawh angin Pastor bial leh Unit ah ten hmalakna kalpui chhunzawm zel tum a nih thu Rev.F.Zorinkhuma chuan sawi bawkin Pro.Pastor David.C.Lalnunkima BCM Chanmari Pastor bial chuan tawngtaina in hun a khar a ni. Hriselna atan tlan tih hun hi tukin vek khan Mizoram chhung hmun hrang hrangah TKP ten an hmang bawk a ni.