853/2024-2025

Aizawl the 18th June, 2024 : School Health & Wellness Programme (Ayushman Bharat) hi Ministry of Health & Family Welfare, Deptt. of School Education & Literacy leh Ministry of Education te tangkawp hmalakna ani a He Program hi Middle school atanga Higher Secondary school-a zirlai te tan duan ni in, Government leh Government aided school-ah te kalpui mek ani. He programme hnuaiah hian Health & Wellness Ambassador atan school tinah Zirtirtu pahnih (mipa leh hmeichhia) te train an ni a, heng mi te hi a tlangpuiin technology lama thiamna nei deuh bik te an ni. Anni bakah hian Scool Principal/ Headmaster te pawh training pek an ni thin bawk.

He Program in a tum langsar zual te chu:

1. Zirlai naupangte an kum mil tawka hriselna leh eitur tha chungchang hrilhhriat. 
2. Nungchang tha leh mawi chawisan.
3. Naupang leh tleirawl te natna/ harsatna rang taka hmuhchhuah leh enkawl.
4. Tui thianghlim in thin tura zirtir.
5. Hmeichhe thanthi nei chungchang a zirtirna.
6. Infiamna chawisan.

Vawiin ni 18 June, 2024 hian Aizawl District bik tan School Health and Wellness Programme atana Headmaster training hi SCERT ah leh DIET ah hawn ni in August 16, 2024 thleng a daih ang. He training hawnna inkhawm SCERT -a neih ah Pi Lalnunsiami Deputy Director SCERT (Population Education Programme changtu) in a kaihruai a, Pi Laldampuii, Project Coordinator   SCERT in School Health Programme Mizoram lo kalpui tawh dan leh he training in a tumte a sawi a, Champhai, Lawngtlai, Lunglei, Mamit leh Siaha District ah te kalpui tawh ni in School 683 a huam tawh a ni, Health & Wellness Ambassador atan zirtirtu 1175 in an train chhuak tawh bawk a ni. Tin, he programme hi Mizoram State AIDS Control Society (MSACS) leh SCERT tangkawpin  Mizoram chhunga Private Schoolah te hmalak ani bawk a ni. He training hawngtu Dr Lalduhawmi Thomte Joint Director chuan thu sawiin School Health Programme in a tum zinga pawimawh te a tarlangin he training module chhunga thu pawimawh awmte a sawi a. Mizoram hi damdawi ruihtheih kalkawng ani chho zel te leh school naupang tam tak damdawi ruihsual laka chhanhim theitu chu school-a zirtirtute hi an ni tih a sawi bawk. SCERT chuan Drug Demand Reduction ah te, Child Rights chungchangah te leh cyber safety inzirtirna ah te School Health programme hmanga hma a lo lak tawh dan te pawh a sawi tel a. He hawnna inkhawm hi Pi Zozikpuii Lecturer SCERT in lawmthu sawiin a khar a ni.