Vawiin chawhnu dar 3.30 khan I&PR Minister Pu Lalruatkima chuan Aizawl leh Kolasib inkarah Leimin in a hnawh thenfai leh zauh hna PWD in a thawh mek chu a hmunah a tlawh.

I&PR Minister Pu Lalruatkima chuan leiminna  laia kawng thar sial leh zauh hnathawktute an hnathawhdan te a zawt a,  an inpekna leh thawhrimaah lawmthu a hrilh a. Mizoram mipui tam zawk chak lakna kawngpuia lirthei tangkhanga khang khualzin leh lirthei khalhtute lo chhawmdawltu Sairang leh Mualkhang khawtlang leh mi tlawmngaite  chungah lawmthu a sawi bawk a ni.

Leiminna lai tak hi, Mualkhang pelh hnu, Buichali Lei thlen hma si, Buichali Lei atang Mualkhang lam rawn tlan pheia Km 8 leh Km 9 inkarah tak a ni a. Minister in a tlawh lai hian kawngpui zauh hna hi chaka taka thawh mek a ni a. Hnathawh nan a hmunhma mil tawk  Excavator 2, Rock Breaker 1 leh  Tipper 6 hman a ni a. He lai hnathawh viltu Er R.Lalduhthlanga, SDO, NH SD IX chuan,"Vawiin chawhnu dar 3 khan thenfai kan in beisei nain Vawiin tlai lamah Lirthei tlang thei turin kan thawk zo hmanin kan ring", a ti a ni.

NH54 Sairang leh Kawnpui inkar hi July 19 khan a min a. Hemi zanah hian hnathawh hi tan nghal a ni a. July 24 khan kal tlang theiha buatsaih a ni naiin kawngnal leh kawng zim avangin lirthei a tang chhunzawm zela. Vawiin khan he lai hmuna kawngpui zauh hna hi thawh a ni a. Hnathawh lai hian Kawnpui leh Leiminna inkarah ringawt pawh Lirthei bungraw phur 600 atang 800 an dinga, hemi zah deuh thaw hi Sairang lamah an ding bawk a ni.