Horticulture Minister leh bialtu MLA ni bawk Pu P.C. Lalthanliana chuan Mualthuam North-a Jerusalem Market sak that chu nimin khan a hawng a, NABARD leh NEIDA ten an buatsaih Tribal Development Project pawh a  hawng nghal a ni.

He hawnna inkhawm hi Pu Lalrokunga Chhakchhuak, District Development Manager, NABARD chuan a kaihruai a. Khuallian Pu P.C. Lalthanliana chuan NABARD leh NEIDA ten Mizoram tan nasa takin hna min thawh sak a, min duhsakna ang hian puih zel tlak kan nih leh nih loh hi keimahni mawh a ni, a ti a. Sawrkar chuan taima leh rinawm taka thawktute chu a ensan dawn lo thu sawiin, sawrkar atanga hamthatna beisei avanga kan tui zawng kan thlak fo hi kan sim a ngai, a ti. Kan chana kan lawm thiam a, tih tak taka kan kal hi kan hlawhtlinna bul a ni tiin, a bial mipuite chu Model Constituency ni thei tura tang tlang turin a sawm nghal a ni.

Khualzahawm Pu D.K. Mishra, General Manager, NABARD leh Pu Dharani Ratno, Executive Director, NEIDA te pawhin thu sawiin, Mizoram hmasawnna atana an hmalakna hrang hrangte an tarlang a. Mizo kuthnathawktute tana hmathlir thui tak an neih thu sawiin, kawng hrang hranga an hmalaknate tih hlawhtlin a nih theih nan mipui thlawpna  an ngen nghal a ni.

Tribal Development Project hnuaiah hian Lunglei RD Block huamchhungah project pahnih ruahman a ni a. Project pakhat ah hian khaw 5 atanga chhungkaw 250 zel a tuam dawn a ni. Kum 6 chhung kalpui a ni anga, phase 1-ah chhungkaw 100 leh phase 2-ah chhungkaw 150 ten tanpuina an dawng dawn a ni. Chhungkaw tinte vawkin sak sak an ni anga, serthlum phun tur kung 110 leh balhla phun tur 60 sem an ni bawk dawn a ni. Project pakhat zel atan hian NABARD-in cheng nuai 123.64, NEIDA-in cheng nuai 83 leh a dawnguten cheng nuai 63.64 hu tha an thawh dawn a ni.

Jerusalem Market hi NABARD, NEIDA leh Mualthuam North VC te thawhkhawm cheng nuai 15 senga sak that a ni a, mi 19 thu thei tura ruahman a ni. Hei bakah hian handloom zawrhna tur room pakhat siam tel a ni bawk.

Attachment

  • Loading attachment...