Social Welfare Minister Pu P.C. Lalthanliana, bialtu MLA ni bawk chuan Vanva Group YMA Conference 28-na, April ni 4 atanga neih tan chu nizan khan a kharna inkhawm Mausen Community Hall-ah a hmanpui.

Pu P.C. Lalthanliana chuan YMA hlutna leh pawimawhna te sawiin, kohhran leh party hrang hrangah te awm mah ila, YMA chuan Mizote min ti pumkhatin, pawl zawng zawng kan leng a ni, a ti a. Kan ram leh hnam atana ralthuam tha ber leh kan hnam himna bulpui ber a ni tiin, YMA a awm chhung chuan Mizote chimral kan ni ngai dawn lo a ni, a ti. Kan hnam rohlu vawng nungtu a ni a, kan hnam nun siamtha tu a ni, a ti bawk.

He inkhawm hi Vanva Group YMA President Pu V. Lianhmingthanga’n a kaihruai a. Pu Roneihthanga, CEC leh Pu RL Zidinga, CEC ten CYMA aiawhin thu an sawi a ni. Pu H. Zosailova, Finance Secretary, Vanva Group YMA chuan inelna hrang hranga lawmman dawngtute hnenah lawmman semna a nei bawk a ni.

Vanva Group YMA hnuaiah hian YMA Branch 11 an awm a ni.