Mizoram Bharat Scouts & Guides zinga Rajya Purushkar Award dawngte chu vawiin khan Raj Bhawan Durbar Hall-ah Mizoram Governor leh Mizoram Bharat Scouts & Guides Patron ni bawk Lt Gen Nirbhay Sharma, PVSM, UYSM, AVSM, VSM, (Retd)-in Certificate a hlan. 

Mizoram Bharat Scouts & Guides State Commissioner leh Sports & Youth Services Director ni bawk Pu Zothanmawia kaihhruai inkhawmah Mizoram Larsap chuan Award dawng zawng zawngte chibai bukin Mizoram state leh India ram tana mi chhawrtlak leh tihmingthatu an nih ngeina tura duhsakna a hlan a. India ramah Scouts dinna hmasa ber chu  kum 1909 khan Bishop Cotton Boys’ School, Bangalore-ah leh Guides pawh kum 1911 din tan a ni leh tih sawiin Pu Nirbhay Sharma chuan ramhruaitu hmasa engemawzat Pandit Nehru leh Maulana Azad te pawh scouts an ni ve thin a, naupang leh thalaite chher nan kum tam tak chhung chu he pawl hlun leh ropui tak hi tangkai hle a ni, a ti. Mizo naupang engemawzatin scouts & guides zawmin nundan tha leh inthununna an zir a, ram siamthatna kawngah Mizoram pum tana entawntlak an nih piah lamah nakin zelah pawh ram hruaitu leh mi challang tak tak an nih chhoh ngei a beisei thu a sawi. Mizoram Larsap chuan Mizo thalaite chu mahni inrintawkna nei chunga khawvel zau zawka dakchhuah ngam tur leh tawng dang pawh thiam belh turin a chah bawk a. Mizote chu ziak leh chhiarah sang hle mahse nunphung diklo, vaihlo leh ruihlo avangin cancer leh natna dang vei an tam a, thangthar zawk ten chu chu hria a, nunphung tha leh hrisel zawk uar sauh sauh turin a chah a ni. 

Vawiina Award hlanna inkhawmah hian Mizoram Governor chuan Scouts 42 leh Guides 48 hnenah Certificate a hlan a; Asst. State Commissioner Pi Liansangluri’n lawmthu sawiin hun a khar a ni. 

Mizoram Bharat Scouts & Guides hnuaiah hian Scout 3496 leh Guides 3941 an awm mek a. Rashtrapati Scouts & Guides neih tawh zawng zawng chu Scouts-168 leh Guides-288 a ni a; Rajya Purushkar Scouts & Guides neih tawh zawng zawng chu Scouts-704 leh Guides-919 a ni. Tun tumah hian Scouts atangin 58 leh Guides 68-in Rajya Purushkar an dawng a, heng hian ramchhunga Scouts & Guides Award sang ber ‘Rashtrapati Scouts & Guides Award’ exam thei turin an tling nghal a ni.