No.332/2020-2021

Health Minister Dr. R. Lalthangliana chuan vawiin khan a chenna inah tunhnaia Mumbai leh Shillong-a COVID-19 vei Mizo pahnih awm thar chungchang a sawifiah.

Mumbai a COVID-19 vei hmuhchhuah thar hi hnute cancer, Mumbai a engemawchen lo inenkawl tawh a ni a, nimin kha a inzai hun tur a nih avangin nimin piah April ni 12, 2020 (Pathianni) chawhnu dar 2:00 khan TATA Memorial Hospital, Mumbai-ah admit a ni a. Hemi ni vek tlai dar 5:00 velah a khua a sik tan a, nasopharyngeal swab lak niin zan dar 11-ah test a ni a, test result hi nimin (April ni 13, 2020) zing dar 6:00 khan chhuakin positive a ni tih hriat a ni. Nimin tlai dar 6:30 khan TATA Memorial Hospital atanga insawnchhuakin COVID-19 vei te enkawlna tura a bika ruahman St. George’s Hospital, Mumbai ICU ah admit a ni a. Nizan atang khan COVID-19 symptoms a lang tawh rih lo a, a taksa pawh ngaihtuahawmin a awm rihlo a, ICU atang hian private ward ah sawn chhuah tura ruahmanna siam a ni. Nasopharyngeal swab pawh lak nawn leh niin test result hi zaninah hriat hman beisei a ni.

Mumbai a COVID-19 vei thar Mizo a awm tih hriat a nih veleh hian Health Minister ruahmanna in Mizoram Chief Secretary Pu Lalnunmawia Chuaungo chuan Mumbai-a sawrkar hotute leh Mizoram House enkawltute a be nghal a. Mumbai Mizoram House pawh nimin vek khan damdawi (disinfectant) hmanga kah thianghlim nghal a ni.  House-ah hian cancer vei damlo 16 leh anmahni enkawltu 32, an vaiin mi 48, an awm mek a. Vawiin khan Mumbai Municipal Corporation a health lam a thawktuten endikin, damlo awm zawng zawng bakah COVID-19 vei hmuhchhuah tak awmna dormitory a awm zawng zawngte nasopharyngeal swab sample 22 test turin an la a, vawiina sample lakte leh damlo awmpuitute zingah tun dinhmunah COVID-19 natna nei anga lang an awm rihlo a ni. Health Minister Dr R.Lalthangliana hian vawiin tlai khan Tata Memorial Hospital, Mumbai Director Dr CS Pramesh chu biain tuna Mizo cancer vei dangte sample test tura lak mek hi an result nghah chhuah a ni ang a, an result a zirin Tata Memorial Hospital-a treatment an lak chhunzawm dan tur ngaihtuah a ni dawn tih a lo hrilh a ni.

Mumbai-a COVID-19 vei damlo pasal pawh COVID-19 natna kai anga thuthang awm chu Health Minister hian amah ngei zuk biain thuthang diklo a ni tih a finfiah a, medical lam thiamten tun thleng hian test tul an la ti rih lo a, a tul dan a zira test chauh tur a ni. Fimkhur thuhla ah March ni 15, 2020 hnu lama Mumbai Mizoram House chhuahsan a Mizoram rawn haw mi 11 te chanchin pawh sawrkarin a ngaihven zui nghal a, tun dinhmunah engmah thil hlauhthawnawm tur a lang lova, heng mite hi anmahni awmna theuh ah kar khat chhung home quarantine a awm rih tura hriattir an ni.

Shillong-a COVID-19 natna kai thar Mizo pakhat chungchang pawh Health Minister hian ngaihvenin a thawhna Bethany Hospital leh NEIGHRIMS Hospital a daktawrte a bia a. Damlo hi a dinhmun a tha a, ICU-ah dah a ngai lovin Bethany Hospital private ward-ah enkawl mek a ni. Health Minister hian Shillong-a Mizo awmte chu thlaphang lo tur leh harsatna an tawhte Sawrkar thuneitute hnenah thlen zel turin a chah a ni.

Zoram Medical College a COVID-19 natna vei damlo mek chanchin pawh sawilangin Health Minister chuan hma a sawn zel a ni a ti a, vawiin chhun dar 12:00 khan ventilator phawi niin oxygen dose pangngai a ring tawh a ni tih a sawi.