No.333/2020-2021

Vawiin chawhnu khan DC Conference Hall, Kolasibah Dr H Lalthlangliana, Deputy Commissioner, Kolasib district kaihhruaina hnuaiah District Level Task Force on Covid-19 ten district chhung a hmalak tawhna thlirletna hun leh hmalak chhunzawm dan tur relin an thukhawm.

Dr H Lalthlangliana chuan sawrkar laipui ruahmanna angin inkharkhipna chu May ni 3 thleng kalpui chhunzawm tur a nih thu leh he inkharkhip chhunzawm chhung a mipui te inkaihhruai dan tur chu sawrkai laipuiin a tihchhuah leh hun ngaihchan mek a nih thu a sawi a. Mi mal leh pawl hrang hrang inpekna zar ah Covid-19 lak a invenna a hman tur sum lo lutte tangkai thei ang ber a hman dan tur te rel niin Chief Minister Relief Fund atang a Cheng 21,45,000 dawn te Village Level Task Force hrang hrang te sem chhuah a nih dan tur te a tarlang nghal bawk a ni. DC chuan ramri hrul a duty te sawrkarin a ngaih pawimawh thu leh heng hmun a duty te mamawh phuhrukna turin CM Relief fund sem chungchangah pawh dah pawimawh an nih thu a sawi bawk a ni. Dr H Lalthlangliana chuan inkharkhip kalpui a nih lai a ram kang a awm thin chuan khawtlang a tihbuai thin thu sawiin ram kang venna kawng a fimkhur inzirtirna uar lehzual turin a chah bawk a ni.

Pi Vanlalfaka Ralte, SP chuan Kolasib district chhung a venhimna kalpui dan hrang hrang te, duty te dinhmun leh ramri hrul a police duty indah dan tlangpui tarlanna hun neiin khawtlang tlawmngai pawl hrang hrang te puihbawm thinnaah lawmthu a sawi bawk a ni.

Pu Vanlalmuana, SDC chuan mipui nitin mamawh phuhrukna kawng a district chhung a hmalakna thenkhat tarlangin buhfai quintal 333.15 chu a mamawh zualte hnenah hralhchhuah a nih tawh thu leh quital 30 dawn chu DC office kaltlangin chhuanchham te hnenah sem ral a nih thu a sawi bawk a ni.

Mimal leh pawl inphal te atanga Covid-19 lak a invenna tur a sum lut hi Cheng 115040 a ni a, Vairengte screening point a mamawh leina tur atan te, Polytechnic Quarantine Facility, Thingdawla hman atan te leh ramri hrul a Task Force duty te hman tur a ruahman nise tih a rel a ni.