4314/2023-2024

Dated Serchhip, the 22nd March, 2024: Vawiin khan MUP District Headquarters, Serchhip chuan Assembly vawi 13-na Serchhip Auditorium-ah an hmang a. He hunah hian Serchhip District a SVEEP Nodal Officer Pi Lalnunmawii, DIPRO Serchhip chuan SVEEP Campaign hun hmangin kalkhawmte vote thlak theuh turin a sawm.

SVEEP Nodal Officer chuan MUP member Assembly hmangtute chibai bukin, Election Commmission of India chuan kum upa te a ngaipawimawh thu te, vote an thlak ngei theihna tura ruahmanna siam a nih dan te a sawi a. Vote thlak pawimawhzia hriaa Lok Sabha Inthlanpui kan hmachhawn meka vote thlak ngei tur leh, an tu leh fate hnenah vote thlak pawimawhzia zirtirtua tang turin a sawm a ni.

MUP District Headquarters Serchhip hnuaiah hian Area sawm (10) awmin Serchhip, Serchhip North, Serchhip South, Thenzawl, Bungtlang, Khawlailung, N.Vanlaiphai, East Lungdar, Lungpho leh Chhingchhip Area ah an inthen a. Heng Area hnuaiah hian branch hrang hranga inthen lehin a zavaiin branch 66 an nei a. Tun dinhmunah member 6188 an awm mek a ni.

MUP District Headquarters Serchhip Assembly vawi 13-na hi an President Pu T Lalrawngbawla’n a kaihruai a. An headquarters chhunga Branch hrang hrang ten lengkhawm zaiin an inel a ni.