4313/2023-2024

Mamit 22nd March, 2024 : Khawvel hmundangte rualin vawiin khan Siamliana Hall, Mamit-ah World Water Day - 2024 chu hman a ni a. Pu V.L. Remliana, District Bawrhsap chuan khuallian niin a hmanpui.

Khuallian Pu V.L. Remliana chuan tui pawimawhna leh hlutna chu kan hriat tawh leh hriat sa a ni a, sakhuana ang zawnga sawi pawhin sakhaw tinte leh tui hian inzawmna thuk tak a nei a ni a ti, chutiang taka pawimawh tui chu engtinnge ka tihpun ang, engtinnge ka humhalh ang tih chu kan in zawh a, ngaihtuahna kan hman a tul hle a, khawvel ram hrang hrang zingah tui khawl tha ber Israel ram chu kan entawn tur a ni, tui pawimawhna hria ram changkang a piangin tui an humhalh a, thangthar naupang zawkte a bikin zirlai kalkhawmte chu tui humhalhna tura tih tur hrang hrangte ngaihven a, tuna kan ram dinhmun chu a lungawithlak tawh loh zia kan hriat thar a, hma kan lak a ngai takzet a ni a ti.

District Bawrhsap chuan kan chenna khawvel hi kan tu leh fa, chhuan lo awm zel turte tana kan luah hawh a ni tih kan hriat a, a tichhetu ni lovin siamtha a, chenna tlak ram nuam siam theitu nih tum theuh turin kalkhawmte a sawm a ni.

He hunah hian Pu C. Lalrinmuana, DFO, Mamit chuan tui hnianghnar kan neih theih nana kan tih tur, tui humhalh leh khawl na tura hriat tur hrang hrangte a lem nen zirtirna a pe a ni.

Word Water Day pual hian thupui "Inrem nan tui" tih hmanga hla inphuahsiak, Poetry (hla chham) inphuahsiak leh Reels insiamsiak ah te lawmman sem nghal niin, hla inphuahsiakah hian 1. HD Lalremruata, 2.Lalrinchhana Hrahsel, 3. Vanlalrema, te an ni a. Poetry (hla chham) ah 1. Lalnunzira 2.Vanlalawmpuia 3. Lalbiakzuala Hmar te an ni. Reels insiamsiakah 1. K.Lalawmpuia 2. Loisi Lalhmingmawii te an ni bawk. Lawmman hian chawimawina thuziak leh pawisa fai a keng tel a ni.

World Water Day-ah Mamit District chhung khua atangin tuihna humhalh tha khua Watsan Competition lawmman sem nghal a ni a. Pakhatna Lallen Watsan Committee, pahnihna Hriphaw Watsan Committee leh pathumna Nghalchawm Watsan Commmittee te an ni.

He hun hi Er. Helen Saibuangi, Sr. Executive Engineer, PHED Mamit Watsan Division chuan a kaihruai a, Er. Malcolm Lalhmingliana, Sr. Sub- Divisional Officer, PHED chuan lawmthu a sawi a. Mamit khawpui chhunga Sawrkar officials, tlawmngaipawl aiawh, khawtlang hruaitu, thutharthehdarhtute bakah zirlai naupang sawmbikte an tel a ni.