Vawiin khan Mizoram Upa Pawl (MUP) chuan General Assembly vawi 42-na Vanapa Hall-ah an hmang a. MZU Vice Chancellor Prof.R.Lalthantluanga chu khuallian a ni.
Prof.R.Lalthantluanga chuan Mizote hi zirna ngaisang hnam kan ni a, sorkarin kut a thlak hma hauh pawhin khaw hrang hrangah zirna sikul siamin khawtlang mipui thahnemngaite'n hma an la hmasa fo a ni, a ti. Kan ram hmasawnna tur ki pawimawh ber chu zirna a ni a, zirna ngaihsan leh hlut nachang kan hriat rualin lehkhathiam hna hmulo tam tak an awm tawh a. Hemi tih remna turin a ruaitute duh dan nena inmil zirna, skill development lamah pawh hma lak chhoh zel a ni, a ti a. Mizoram mamawh ber zirna that chhoh zel theih nana finchhuah turin MZU Vice Chancellor chuan upate a sawm a ni.
MUP General Assembly hi an pawl President Pu K.Malsawma'n a kaihruai a. MUP General Headquarters buatsaih lehkhabu 'Rambuai lai leh kei' bu hnihna, chu khuallian Prof.R.Lalthantluanga'n a tlangzarh nghal a ni.
India hmarchhak hmeichhiate zinga sumdawng hlawhtling, mahni kutkawih liau liauva hlawhtlinna chhartu te leh mi harsa zawkte tanpui kawnga nu entawntlak te hnena an pek thin ‘Vasundhara - NE Woman Entrepreneur of the Year (2012-13)’ award dawngtu, KC Face Pack neitu Pi Lalmuankimi hnenah a bika chawimawina, MUP General Hqrts. chuan an hlan bawk a ni.
MUP General Assembly hi nilenga neih niin chawhnu ah palai te'n ro an rel a. An agenda hrang hrang zingah Mizo tawng tih hmasawn nan leh tawng upa humhim nana hmalak te, Mizo thalai Competitive Exam bei duh te tana Coaching Class siam tura sorkar ngen te, Mizoramah kutdawh an awm miah lohna tura hmalakte leh khawpui hrang hranga step siam tawh leh siam turah vawnban (railing) dah vek tura sorkara ngen te a tel a ni.
