Vawiin khan Art & Culture Department leh MUP General Headquarters tangkawp chuan Aizawl khawpui chhunga MUP lengkhawm zai intihsiak chu Vanapa Hall-ah neih a ni a. Art & Culture Minister Pu R.Romawia’n a hmanpui.

Lengkhawm zai intihsiakah hian Aizawl khawpui chhunga Area 11-a a titha ber theuh ten Final Round an lut a. An intihsiakna hlate chu - Patea phuah “Ka damlai thlipui a ral hunin”, Damhauhva phuah “Zun phur thing tin par”leh Rev. P.D.Sena phuah “Thlafam ngaia tlaini len chu” tih te a ni a. Intihsiaka tel te hian heng hla zinga an duh ber an thlang a, a pahnih dang atangin sak tur pawt lehin hla pahnih hmangin an intihsiak a ni.

Chawhnu dar 2 ah Art & Culture Director Pu Ngurbiaka kaihhruaiin intihsiak kharna leh lawmman semna hun hman a ni a. Khuallian Pu R.Romawia chuan lawmman te hi a sem a ni.

Aizawl City Area MUP Lengkhawm Zai Intihsiak a lawmman pakhatna la tu chu Bungkawn Unit, Aizawl West III niin thuziak leh Rs. 7,000/- an dawng a, pahnihna Ramthar Veng Unit, Aizawl East I chuan thuziak leh Rs. 6,000/- dawngin pathumna Saikhamakawn Unit, Aizawl South III chuan thuziak leh Rs. 5,000/- an dawng a ni. Khuangpu tha ber atan Bungkawn Unit a mi Pu K.Ngaizuala thlan a ni a, hla hril thiam ber chu Pi Lalzikpuii, Bungkawn Unit a mi a ni. Hemi rual hian MUP Gen.Hqrs. Literature Sub Committee buatsaih MUP Hla Chham mi leh MUP Hla Inphuahsiak result puan nghal a ni a. Hla chham mi ah Rochungnunga, Vairengte pakhatna a ni a, B.Lalhriattira, Mission Vengthlang chu pahnihna niin HL Chhinga, Salem Veng chu pathumna a ni. Hla sak mi ah lawmman pakhatna la tu chu Lalhmangaihzuala Sailo, Thingsul Tlangnuam a ni a, pahnihna Vanlalzawna, Keifang Vengthar, pathumna Hrangzika, Pukzing te an ni.