Vawin chawhnu dar 1:00 khan I&PR Auditorium-ah Faina hapta 2014 kharna inkhawm neih a ni a, Pu Lalnunmawia Principal Govt Champhai College chuan khuallian niin a hman pui.

Khuallian Pu Lalnunmawia chuan thusawiin, Champhai khawpui hian Kumtluana fai kan mamawh a, thianghlimnna leh faina hi thil kalkawp tlat a ni a, thil eng pawh a awmna hmuna awm lo chu bawlhhlawh a ni a, faina kawnga hma kan sawn theih nan engkim a hmunah tak kan dah tur a ni a ti a, Champhai kan niha kan hmangaih chuan a chhung kan vawngfai tur a ni a ti .

Faina Hapta 2014 kharna inkhawm kaihruaitu Pi V Lalmuanpuii, DUDO UD&PA Champhaiin pawhin Faina hapta kharna inkhawm chu Faina kawnga bul tanna nise a duh thu a sawi a, Faina hapta chhungin Veng hrang hrang leh School hrang hrangte'n faina kawngah nasa takin hma an la chu lawmawm a tih thu a sawi bawk. Pi Muanpuii chuan bawlhhlawh kan paihna hian chhiatna min thlen thei a, chhiatna laka kan him theihna turin a hmunah tak bawlhhlawh kan paih a ngai a ni a ti.

He hunah hian Faina Hapta 2014 chhunga fai lawmman sem a ni a. School fai lawmman pakhatna Zote Primary School in an dawng a, PS IV Kanan pahnihna niin Kanan Middle School in lawmman pathumna an dawng bawk. Veng fai lawmman pakhatna Vengthlang North in dawngin, Kahrawt pahnihna an ni a, Champhai Venglaiin pathumna lawmman an dawng bawk. Fai lawmman hian Chawimawina thuziak bakah pawisa fai a keng tel bawk.

Vawiin Faina Hapta kharna inkhawm hi Pu Zoengsanga, Addl. DC, department hrang hrang te leh zirlai ten an hmang a, Champhai zaithiam lar Ruatfeli’n kalkhawmte zaiin mawi takin a awi bawk a ni.