No.3406/2021-2022
Aizawl, the 15th December 2021: Vawiin chawhma khan Raj Bhavan-ah Mizoram Underground Returnees Association (MURA) hruaitute chuan Governor Hari Babu Kambhampati an hmu a. Governor hnenah hian MURA member ten harsatna an tawh chungchangah tanpuina an dil a ni.

MURA hruaitute chuan Governor Hari Babu Kambhampati hnenah hian an pawl nih phung leh din dan te an sawi a. Peace Accord hnuaia hamthatna te an dawng ve lo nia sawiin tunah hian chhungkaw tam tak chu eizawnna mumal nei lovin harsa takin an khawsa mek tih an sawi a. Mizoram sawrkar atanga hamthatna te an dawn ve theih nan a puihna an dil tih Governor hnenah hian an sawi a ni.

Governor Hari Babu chuan MURA member te harsatna chu ngun zawk a lo zirchian a tum thu a sawi a. A tul chuan state sawrkar thuneitute pawh MURA te thil ngiat chu lo sawipui a tum thu a sawi bawk a ni. Governor chuan MURA hruaitute ngenna angin MURA member Aizawl khawpuia cheng zinga harsa zualte tanpuina atan pawh tanpuina pek a tum bawk a ni.

He hunah hian Governor hnenah MURA aiawhin Pu PC Lalthuama, President, Pu R.Vanlalvena, General Secretary leh MURA executive member ten MURA te tana hamthatna ngaihtuahpui tura ngenna lehkha an thehlut nghal bawk a ni.