No.3407/2021-2022

Aizawl 15th December 2021: Vawiin chawhma khan Deputy Commissioner, Kolasib pisaah District TB Prevention Treatment Committee leh District Task Force on Immunization-te chuan thutkhawmna neiin kum 2021-22 chhunga hmalakna thlirletna leh hmachhawp sawihona hun an hmang a. Dr.H.Lalthlangliana, Deputy Commissioner-in he hun hi kaihruaiin Dr.R.K.Lalthlamuana, SMO-in report a pe bawk a ni.

Kolasib district-a Covid-19 Vaccination pek dan chhinchhiah danin ni 14, December 2021 thleng khan 1st Dose la tawh mi 51210 leh 2nd Dose la tawh mi 39116 an awm tawh a. Vaccine la thei tur mi 55499 chhinchhiah atangin 1st Dose la tawh hi za zelah 92.27 an tling tawh a ni. Har Ghar Dastak (Door to Door) Vaccination kalpui mekah khaw 26 tlawhchhuah tawh atangin 1st Dose 141 leh 2nd Dose 447 pek a ni tawh bawk.

Intensified Pulse Polio Immunization Programme 2022 chhung a kalpui dan tur sawiho niin ni 25, January 2022-ah kalpui tan tum a ni a. He programme atan hian naupang kum 5 hnuai lam 9490 hnenah Immunization Booth 107 kaltlangin zeng danna hi pek tum a ni. Routine Immunization hi November 2021 thleng hian tum 257 kalpui a lo ni tawh a, High Risk Area panga, Dilzau, Zodin, S.Chhingluang, Awrpuara Veng leh N.Thinglianah te hian tum 4 tal kumin chhung hian buatsaih hman tum a ni bawk.

Tuberculosis (TB) natna lanchhuah dan, endik dan leh enkawlna kalpui dante tarlan niin TB vei hmuhchhuahte bakah an chenpuite nen a enkawlna pek an nih dan te ngaihthlak a ni a. Kolasib district-ah kum 2021 chhung khan TB vei enkawl 127 an awm thu leh December 2021 atang hian Programmatic Management of TB Preventive Treatment (PMTPT) kalpui tan a nih thu thutkhawmnaah hian tarlan a ni a. Kum 2021, 2nd & 3rd Quarter chhunga TB enkawlna kalpui tha berah Kolasib District hi thlan a ni mek bawk a ni.