Nithum chhung awh tur Museum, thilhlui leh lehkhabu hlui pholanna exhibition chu nimin khan Dokulha Hall Lawngtlai-ah tan a ni. Mizoram sorkar Art & Culture Deptt. leh Lai Autonomous District Council hnuaia Art & Culture Deptt. te tangdun buatsaih hi LADC EM C. Lalneihkhuman a hawng a ni.

He exhibition-ah hian Art & Culture Deptt. hnuaia Archive in lehkhabu hlui leh rotling tak tak an vawnthatte pholan a ni a. Lunglei Museum atang pawhin  hmasang pi leh pu te nundan lan theihna rotling hmanraw tam tak mipuite en theih tura pholan an ni. Exhibition in a tum ber chu thangthar leh naupang zawkten pi pu rothil leh sulhnu an hmelhriat theih nan leh thuziak hmasa hrang hrang tangkaina te zirtir a ni ber.

Exhibition hawngtu LADC EM chuan hetiang hun pawimawh Lawngtlai khawpuia nghah anih avanga a lawmthu a sawi a. LADC hnuaia Art & Culture Deptt.  pawhin pipu rohlu vawngtha tura theih tawp a chhuah dan te, a bikin Lai hnam sulhnu upa tak takte pawh tha takin an vawnthat thute a tarlang.