Vawiin khan Pu P.C. Zoram Sangliana, Art & Culture Minister chuan Archives Building, Babutlang-ah Art & Culture Department hnuaia Office pathum- Mizoram State Museum, Mizoram State Archives leh Tribal Research Institute tang tlangin an buatsaih, ni thum awh tur “ Museum & Record Exhibition-cum-Book Sale” a hawng.

Pu P.C. Zoram Sangliana chuan kan State khawpui Aizawlah Art & Culture Department hnuaia wing pathum tangrualin, a vawikhatna atana he Exhibition an buatsaih chu lawmawm a tih thu sawiin, thil hlu leh vang tak, mipuite tana a thlawna en theih tura buatsaih hi tangkai taka hman ni se a duh thu a sawi a. Mi puitling, ram tana chhawrnahawm leh khua leh tui tha chher turin Library, Museum leh Archives te chu hmanraw pawimawh tak an nih thu sawiin, an tangkaina leh hlutna te haichhuaka, hengte hmanga intah hriam a tul thu a sawi bawk.Kanhnam ro thil phochhuahte hlut thiam a tul thu sawiin, zirlaite tana an zirna kawnga tangkai tak tur a nih hriaa, zirtirtute pawh an naupangte hruaia he Exhibition-cum-Sale hi rawn enpui theuhturina sawm bawk. Pu Zoram Sangliana chuan Art & Culture Department chu khawvel hriata kan hnam pholangtu an nih thu sawiin, hlamchhiah bik neilova thingtlang lamah pawh Exhibition an lo buatsaih fo thin chu chhuanawm a tih thu leh an thawhrimnate Mizoram leh Mizo hnam tana malsawmna thlentu a nih zel a beisei thu a sawi bawk.

He hun hi Pu Ngurbiaka, Director, Art & Culture Department chuan kaihruaiin, Pu F. Lalthanmawia, Archivist, Mizoram State Archives chuan report a pe bawk. He Exhibition-ah hian Mizo thil hlui leh hlu tak tak; Sorkar, mimal, pawl leh kohhran record pawimawh leh ziaka chhuah te, Mizo leh ram chanchin a bu-a chhuah tha tak tak te phochhuah a ni dawn a. Lehkhabu phochhuah zingah hian lehkhabu tha leh hlu, chhut ngai tawh loh (Out of print) te telin, heng bakah hian zawrh chhuah te pawh an nei dawn bawk a ni. Mizoram State Archives-in Record/Document 60 leh thlalak 27 an phochhuak anga, Mizoram State Museum-in Object 67 phochhuakin, Tribal Research Institute chuan lehkhabu vang, chhut ngai tawhlo 12 leh zawrhchhuah tur 52 an phochhuak bawk ang. He Exhibition hi ni 17 atanga 19 September, 2013 chhung neih tur a ni a, Mizo mipuite a tam thei ang ber chhimturinan sawm a ni.